జోరు వానలోనే రోడ్డు నిర్మాణం...తీవ్రంగా పరిగణించిన ఉన్నతాధికార్లు

కాసుల కోసం ఎంతటిపనినైనా చేసేస్తారు కొందరు. తాజాగా  పంజాబ్ రాష్ట్రంలో ఓ వింత ఘటన నెలకొంది. ఎడతెరిపి లేకుండా కురుస్తోన్న వర్షాలకు బయటకు వెళ్లే పరిస్థితి లేదు. అలాంటిది ఈ భారీ వర్షంలో రోడ్డు పనులు జరుగుతున్నాయి. వానలకు తడుచుకుంటూ కూలీలు పనులు చేస్తున్నారు. దాంతో నలుగురు అధికారులను సస్పెండ్ చేశారు. పంజాబ్‌లోని హోషియార్‌పూర్‌లో ఈ ఘటన చోటుచేసుకుంది. షేర్‌పూర్ డాకో గ్రామంలో వర్షం కురుస్తోండగా కొందరు రోడ్డు పనులు చేస్తున్నారు. భారీ వర్షాల్లో కార్మికులు పనులు నిర్వహించారు. ఆ దృశ్యాలను గ్రామస్థులు వీడియోగా రికార్డ్ చేశారు. ఆ వీడియో సోషల్ మీడియాలో వైరల్ అయింది.

ఆ వీడియో వైరల్ అవ్వడంతో అధికారులు కన్నెర్ర చేశారు. అధికారులు వెంటనే చర్యలు తీసుకున్నారు. రోడ్డు నిర్మాణ పనులు చేపట్టిన నలుగురిపై వేటేశారు. సంబంధిత అధికారులు తర్సేమ్ సింగ్ (సబ్ డివిజనల్ ఇంజనీర్), విపన్ కుమార్ (జూనియర్ ఇంజనీర్), పర్వీన్ కుమార్ (జూనియర్ ఇంజనీర్), జస్బీర్ సింగ్ (జూనియర్ ఇంజనీర్) అనే నలుగురు అధికారులపై సస్పెండ్ చేశారు.

అయతే ఆ వీడియోపై ఆమ్ ఆద్మీ పార్టీ కార్యకర్త గుర్విందర్ సింగ్ స్పందించారు. వర్షాల సమయంలో రహదారిని నిర్మించవద్దని భవన నిర్మాణ కార్మికులను కోరానని, వారు దానిని పట్టించుకోలేదని అన్నారు. వర్షాకాలంలో రోడ్లు నిర్మించడం వల్ల నాణ్యత లోపించిందన్నారు. కాగా హోషియార్‌పూర్‌తో సహా పంజాబ్‌లోని పలు నగరాల్లో భారీ వర్షాలు కురుస్తాయని భారత వాతావరణ శాఖ అంచనా వేసింది. రాబోయే ఐదు రోజులు రాష్ట్రంలో ఉరుములు, మెరుపులతో చాలా విస్తారంగా వర్షాలు కురిసే అవకాశం ఉంది.