ద్రౌపది ముర్ముకే శివసేన కూడా జై

ద్రౌపది ముర్ముకే శివసేన పార్టీ కూడా జై కొట్టబోతోందా అంటే పరిస్థితులు అవుననే అంటున్నాయి. రాష్ట్రపతి ఎన్నికల్లో ఎన్డీయే అభ్యర్థి ద్రౌపది ముర్ము (కు ఓటేయాలని శివసేన చీఫ్ ఉద్ధవ్ థాక్రే నిర్ణయించారని సమాచారం. ప్రచారంలో ఉన్న ఈ నిర్ణయంపై  కాంగ్రెస్ భగ్గుమంటోంది. రాష్ట్రపతి ఎన్నికల్లో ఎవరికి ఓటేయాలనే విషయమై.. సోమవారం ఉద్ధవ్ నివాసమైన ‘మాతోశ్రీ’లో శివసేన నేతలు సమావేశమయ్యారు. ఈ భేటీలో పాల్గొన్న వారిలో చాలా మంది ముర్ము అభ్యర్థిత్వంవైపే మొగ్గు చూపారని తెలుస్తోంది. ఇందుకు సంబంధించి అధికార ప్రకటన త్వరలోనే ఉద్ధవ్ థాక్రే క్యాంప్ నుంచి వెలువడుతుందని సమాచారం.

ఈ వార్త బయటకు రాగానే కాంగ్రెస్ నేతలు ఘాటుగా స్పందిస్తున్నారు. ఎన్డీయే రాష్ట్రపతి అభ్యర్థికి శివసేన సపోర్ట్ చేయాలని భావించడం.. పార్టీలో ప్రజాస్వామ్యానికి ముగింపు అని మహారాష్ట్ర కాంగ్రెస్ నేత సంజయ్ నిరూపమ్ అభివర్ణించారు. ‘ఒకవేళ ద్రౌపది ముర్ముకు శివసేన మద్దతునిస్తే అది చారిత్రాత్మకం అవుతుంది. ఎందుకంటే ఇంతకు ముందు బాలాసాహెబ్ థాక్రే ఆదేశాలు జారీ చేస్తే ఎంపీలు ఫాలో అయ్యేవారు. ఇప్పుడు ఎంపీలు ఆదేశిస్తే.. పార్టీ అనుసరిస్తోంది. శివసేన అంతర్గత ప్రజాస్వామ్యానికి ఇదో పరీక్ష’ అని సంజయ్ నిరూపమ్ ట్వీట్ చేశారు.

మరోవైపు శివసేన ఎంపీ సంజయ్ రౌత్ మాట్లాడుతూ.. ద్రౌపది ముర్ముకు మద్దతు ప్రకటించడమంటే.. బీజేపీకి సపోర్ట్ చేసినట్లు కాదన్నారు. తమ అధినేత ఒత్తిడిలో ఎలాంటి నిర్ణయం తీసుకోరన్నారు. ‘‘దౌప్రది ముర్ము గురించి నిన్నటి భేటీలో మేం చర్చించాం. అందరి అభిప్రాయాలను అర్థం చేసుకున్నాం. ముర్ము అభ్యర్థిత్వానికి ఆమోదం తెలపడం అంటే.. బీజేపీకి సపోర్ట్ చేసినట్లు కాదు. ఈ విషయంలో శివసేన పాత్ర ఒకట్రెండు రోజుల్లో తెలుస్తుంది. ఈ విషయమై మా అధినేత ఉద్ధవ్ థాక్రే ఒక నిర్ణయం తీసుకుంటారు. దేశంలో ప్రతిపక్షం మనుగడ సాగించాలి. యశ్వంత్ సిన్హా పట్ల కూడా మాకు మంచి అభిప్రాయం ఉంది’’ అని రౌత్ తెలిపారు. ఇంతకు ముందు రాష్ట్రపతి ఎన్నికల్లో తమ పార్టీ ప్రతిభా పాటిల్, ప్రణబ్ ముఖర్జీలకు మద్దతునిచ్చిన విషయాన్ని శివసేన ఎంపీ గుర్తు చేశారు.

ఇటీవల మహారాష్ట్రలో జరిగిన పరిణామాలు అందరికీ తెలిసిందే. శివసేన నేత ఏక్‌నాథ్ షిండే తిరుగుబాటు చేయడంతో.. ఉద్ధవ్ థాక్రే సీఎం కుర్చీ నుంచి దిగిపోగా.. బీజేపీ మద్దతుతో షిండే ముఖ్యమంత్రి పీఠంపై కూర్చున్నారు. శివసేన ప్రస్తుతం రెండు వర్గాలుగా చీలిపోయింది. ఈ నేపథ్యంలో.. ఉద్ధవ్ ద్రౌపది ముర్ముకు ఓటేయాలని తమ పార్టీ నేతలను ఆదేశిస్తే.. అది కొత్త సమీకరణలకు దారి తీసే అవకాశం ఉంది.