తమిళనాడు సీఎం ఎం.కే.స్టాలిన్ కు కరోనా
national | Suryaa Desk | Published : Wed, Jul 13, 2022, 05:48 PM
తమిళనాడు ముఖ్యమంత్రి ఎంకే స్టాలిన్ కరోనా సోకినట్లు నిర్ధారణ అయింది. మంగళవారం (జులై 12) ఉదయం కాస్త అలసటగా అనిపించిందని.. కొవిడ్-19 నిర్ధారణ పరీక్షలు నిర్వహించుకోగా పాజిటివ్ అని తేలిందని ట్విటర్ ద్వారా ఆయనే స్వయంగా వెల్లడించారు. దీంతో హోమ్ ఐసోలేషన్‌లో ఉన్నట్లు వెల్లడించారు. ‘అందరూ మాస్కులు ధరించండి. వ్యాక్సిన్ వేసుకోండి. సేఫ్‌గా ఉండండి’ అని స్టాలిన్ ట్వీట్ చేశారు. అంతకు కాసేపటి ముందే ఆయన మాస్కు లేకుండా కొన్ని కార్యక్రమాల్లో పాల్గొన్నారు. దీంతో సీఎం స్టాలిన్ వెంట ఉన్న అధికారులు సైతం పరీక్షలు నిర్వహించుకున్నట్లు తెలుస్తోంది.
సీఎం స్టాలిన్ కొన్ని రోజులుగా ప్రభుత్వ కార్యక్రమాల్లో మాస్క్ లేకుండా కనిపిస్తున్నారు. జులై 8, 9 తేదీల్లో ఆయన పాల్గొన్న ప్రభుత్వ కార్యక్రమాల్లోనూ మాస్క్ ధరించలేదు. అంతేకాకుండా ఈ కార్యక్రమాలకు అధికారులు, ఆయా ప్రాంత ప్రజలు పెద్ద ఎత్తున హాజరయ్యారు. మరీ ముఖ్యంగా.. మంగళవారం ఉదయం కరోనా పాజిటివ్‌గా నిర్ధారించడానికి కొన్ని గంటల ముందు సీఎం స్టాలిన్.. చెన్నైలో చెస్ ఒలింపియాడ్‌కు సంబంధించి చేస్తున్న ఏర్పాట్లను పరిశీలించారు. అధికారులతో సమీక్షించారు. మరోవైపు.. తమిళనాడులో సోమవారం కొత్తగా 2,448 కరోనా కేసులు నమోదయ్యాయి. వీటిలో ఒక్క చెన్నై నగరంలోనే 796 కేసులు ఉన్నాయి.
|
|