అమెరికాను వెంటాడుతున్న ధరల పెరుగుదల సమస్య

నిత్యవసర వస్తువులపై భారీగా పెరుగుతోన్న ధరలు అమెరికాలో చాలా కుటుంబాలపై తీవ్ర ప్రభావాన్ని చూపుతున్నాయి. నిత్యావసరాల ఖర్చులను పెంచుతోంది. ఈ ధరలు సగటు ఆదాయాల కంటే వేగంగా పెరుగుతున్నాయి. తక్కువ ఆదాయం గల, బ్లాక్ అమెరికన్లపై తీవ్ర ప్రభావాన్ని చూపనుందని తెలుస్తోంది. వారు సంపాదించే ఆదాయంలో అత్యధిక భాగం హౌసింగ్, ట్రాన్స్‌పోర్టేషన్, ఫుడ్‌పైనే ఖర్చు పెడుతున్నారు. ఇప్పటి వరకు అడ్డూఅదుపు లేకుండాపెరుగుతోన్న ద్రవ్యోల్బణం ఎకానమీలో వినియోగదారుల విశ్వాసాన్ని భారీగా దెబ్బతీస్తోంది.

గ్యాస్, ఫుడ్, రెంట్ ధరలు పెరగడంతో.. అమెరికా ద్రవ్యోల్బణం కనీవిని ఎరుగని రీతిలో పెరిగింది. జూన్ నెలలో ఈ ద్రవ్యోల్బణం సరికొత్త 40 ఏళ్ల గరిష్టానికి ఎగిసింది. ద్రవ్యోల్బణం భారీగా పెరగడంతో.. ఫెడరల్ రిజర్వు మళ్లీ భారీగా వడ్డీ రేట్లను పెంచుతుందని అనలిస్టులు అంచనావేస్తున్నారు. దీంతో ఇక నుంచి అమెరికన్లు రుణం తీసుకోవడం కష్టంగా మారనుంది. వినియోగదారుల ధరలు గతేడాదితో పోలిస్తే జూన్ నెలలో 9.1 శాతానికి పెరిగినట్టు ప్రభుత్వ డేటాలో తెలిసింది. 1981 తర్వాత నుంచి అత్యధికంగా నమోదుకావడం ఇదే తొలిసారి. మే నెలలో నమోదైన 8.6 శాతం నుంచి కూడా ఈ ద్రవ్యోల్బణం 9.1 శాతానికి పెరిగింది. నెలవారీ లెక్కన చూసుకుంటే మే నుంచి జూన్ నెల వరకు ధరలు 1.3 శాతం పెరిగాయి. ఏప్రిల్ నుంచి మే నెలకు 1 శాతం జంప్ చేశాయి. ప్రతి నెలా 1 శాతానికి పైగా ధరలు పెరుగుతున్నాయి.

అమెరికాలో గ్యాస్ ధరలు మే నుంచి జూన్ వరకు 11.2 శాతం పెరిగాయి. ఎనర్జీ సర్వీసుల ధరలు 3.5 శాతం పెరిగాయి. 2006 తర్వాత ఇదే అత్యధిక గరిష్ట స్థాయి. ఫుడ్ ఖర్చులు కూడా గతేడాది నుంచి 10.4 శాతం ఎగిసినట్టు తెలిసింది. 1981 తర్వాత ఇంత పెరుగుదల నమోదు కావడం ఇప్పుడే.ఈ ధరల పెరుగుదలతో అమెరికా ద్రవ్యోల్బణం ఆకాశాన్ని తాకింది.

అయితే ఈ పెరుగుతోన్న ద్రవ్యోల్బణం ప్రెసిడెంట్ జో బైడెన్‌పై మరింత ఒత్తిడి పెంచుతోంది. మధ్యంతర ఎన్నికలు రాబోతున్న తరుణంలో ఈ ద్రవ్యోల్బణం పెరుగుతుండటంతో.. డెమొక్రాట్లకు మద్దతు తగ్గుతోంది. మరోవైపు ఫెడరల్ పాలసీ ఇప్పటికే వడ్డీ రేట్ల పెంపుపై సంకేతాలు ఇచ్చింది. ద్రవ్యోల్బణం పెరుగుదల, ఉద్యోగ, వేతన డేటా ప్రకారం ఈ నెల చివరిలో కచ్చితంగా రెండోసారి 75 బేసిస్ పాయింట్ల మేర వడ్డీ రేట్లను పెంచనున్నట్టు ఫెడ్ పాలసీ తెలిపింది.