మీకు చిత్తశుద్దివుంటే హోదా ప్రకటన వచ్చాకే ఓటు వేయండి: సీబీఐ మాజీ జేడీ లక్ష్మీనారాయణ

మీకు చిత్తశుద్దివుంటే ఏపీకి ప్రత్యేక హోదాను కేంద్రం ప్రకటించాకే  రాష్ట్రపతి ఎన్నికల్లో  బీజేపీ అభ్యర్థికి ఓటువేయాలని  సీబీఐ మాజీ జేడీ లక్ష్మీనారాయణ సవాల్ విసిరారు.  రాష్ట్రపతి ఎన్నికల్లో వైసీపీ, టీడీపీల తీరును లక్ష్మీనారాయణ తప్పుబట్టారు. ‘ఆంధ్రప్రదేశ్ ప్రత్యేక హోదా సాధించడానికి ఈ రెండు పార్టీలకి రాష్ట్రపతి ఎన్నికలే సరైన అవకాశం. అవిశ్వాస తీర్మానాలు, రాజీనామాలు, ఎన్‌డిఎ నుంచి వైదొలగడం రాజకీయంగా లబ్ధి పొందేందుకు ప్రయత్నించారు. చిత్తశుద్ధి ఉంటే కేంద్రం ఏపీకి ప్రత్యేక హోదా ప్రకటన చేసిన తర్వాతే ఓటు వేయాలి’ అంటూ ట్వీట్ చేశారు.

అంతేకాదు ఇటీవల లక్ష్మీనారాయణ ఆసక్తికర వ్యాఖ్యలు చేశారు. దేశ వ్యాప్తంగా ముందస్తు ఎన్నికలు జరుగుతాయన్న ప్రచారంలో వాస్తవం లేదన్నారు. ముందస్తు ఎన్నికల ప్రచారం ప్రజల్లోనే ఉందని.. పార్టీల్లో లేదని అభిప్రాయపడ్డారు. ముందస్తు ఎన్నికలతో ప్రజలపై ఆర్థిక భారం పడుతుందని.. రెండేళ్ల సమయం ఉన్నా.. ముందే ఎన్నికల వాతావరణం కావాలని సృష్టిస్తున్నారన్నారు. ఎన్నికల్లో ఎవరు కావాలో ప్రజలు నిర్ణయిస్తారని.. ప్రజలు రాజకీయ నాయకులను ఐదేళ్ల కోసం ఎన్నుకుంటారని గుర్తు చేశారు.

ఎన్నికలు ముందుగా నిర్వహించటం వల్ల కోట్ల రూపాయల ప్రజాధనం వృధా అవుతుందని వ్యాఖ్యానించారు. ముందస్తు ఎన్నికల ప్రచారంతో ప్రజలు ఎన్నికల మూడ్‌లోకి వెళ్లిపోయి అసలు సమస్యలు పక్కదారి పడతాయని.. దేశంలో నిరుద్యోగ సమస్య, రాష్ట్రాల అప్పులపై చర్చలు జరగాలని అభిప్రాయపడ్డారు. 2024 ఎన్నికల్లో మార్పు తెచ్చేందుకు తనవంతు పనిచేస్తున్నానని.. సమాజాన్ని చైతన్యవంతం చేసే పనిలో ఉన్నానని చెప్పుకొచ్చారు.

రాష్ట్రపతి ఎన్నికలలో తమ అభ్యర్దిని గెలిపించేందుకు కావాల్సిన పూర్తి మెజారిటీ బీజేపీకి లేదని గుర్తు చేశారు లక్ష్మీనారాయణ. ఈ ఎన్నికల్లో గెలిచేందుకు బీజేపీకి వైసీపీ మీద ఆధారపడాల్సిన అవసరం ఉందని వైసీపీకి ఇది మంచి అవకాశంగా అభివర్ణించారు. ప్రత్యేక హోదా డిమాండ్‌ను నెరవేర్చుకునేందుకు ఇది సరైన సమయమని.. బీజేపీని ప్రత్యేక హోదా దిశగా ఒత్తిడి చేసి సాధించటంతో ద్వారా రాష్ట్ర ప్రజలకు ప్రయోజనం కలుగుతుంది అన్నారు.