ఎదురుకాల్పుల్లో..ఇద్దరు గ్యాంగ్ స్టార్ల హతం

పంజాబ్ లో పోలీసులకు గ్యాంగ్ స్టార్స్ కు మధ‌్య తుపాకుల  కాల్పుల మోత కొనసాగింది. పంజాబీ గాయకుడు, కాంగ్రెస్‌ నేత సిద్ధూ మూసేవాలా హత్య కేసులో కీలక పరిణామం చోటు చేసుకుంది. అమృత్‌సర్‌ సమీపంలో అనుమానితులు, పోలీసుల మధ్య ఎదురు కాల్పులు జరిగాయి. ఈ కాల్పుల్లో ఇద్దరు గ్యాంగ్‌స్టర్లు హతమయ్యారు. అమృత్‌సర్‌ సమీపంలోని భక్నా గ్రామంలో బుధవారం (జులై 20) మధ్యాహ్నం భీకర ఎదురు కాల్పులు చోటు చేసుకున్నాయి. సిద్ధూ మూసేవాలా హత్య కేసులో పోలీసులు దర్యాప్తు ముమ్మరం చేశారు. నిందితులను పట్టుకొనేందుకు ముమ్మరంగా గాలింపు చర్యలు చేపట్టారు. ఈ క్రమంలో పరారీలో ఉన్న ఇద్దరు గ్యాంగ్‌స్టర్లను పట్టుకొనేందుకు ప్రయత్నించిన సందర్భంలో ఈ ఎన్‌కౌంటర్ చోటు చేసుకున్నట్లు పోలీసు అధికారులు తెలిపారు.

ఈ ఎన్‌కౌంటర్‌లో జగ్‌రూప్‌ సింగ్‌ రూపా, మన్‌ప్రీత్‌ సింగ్‌ అలియాస్‌ మన్నూ కూసా హతమైనట్లు పోలీసు అధికారులు తెలిపారు. పంజాబ్‌ పోలీసు విభాగానికి చెందిన యాంటీ గ్యాంగ్‌స్టర్‌ టాస్క్‌ఫోర్స్‌.. సింగర్ మూసేవాలా హత్య కేసులో అనుమానితులుగా ఉన్న ఇద్దరు గ్యాంగ్‌స్టర్లను పట్టుకొనేందుకు ప్రయత్నించారు. వారు పారిపోయేందుకు ప్రయత్నించి ఓ ప్రాంతంలో దాక్కున్నారు. పోలీసులు ఆ ప్రాంతాన్ని చుట్టుముట్టడంతో కాల్పులకు దిగారు. దీంతో పోలీసులు ఎదురు కాల్పులు ప్రారంభించారు.

స్థానికులు ఎవరూ బయటకు రావొద్దని, ఇళ్లలోనే ఉండాలని పోలీసులు విజ్ఞప్తి చేశారు. ఆ మార్గంలో వాహనాలను నిలిపివేశారు. ఈ ఎన్‌కౌంటర్‌లో ముగ్గురు పోలీసులకు తీవ్ర గాయాలు కాగా.. వారిని అమృత్‌సర్‌లోని ఓ ఆస్పత్రిలో చేర్పించినట్టు పోలీసులు తెలిపారు. ఓ జర్నలిస్టు కూడా గాయపడినట్లు తెలుస్తోంది. సిద్ధూ మూసేవాలా (28) మే 29న దారుణ హత్యకు గురయ్యారు. ఇద్దరు స్నేహితులతో కలిసి మాన్సా జిల్లాలోని స్వగ్రామానికి వెళ్తుండగా మార్గమధ్యలో ఆయణ్ని అడ్డగించి బుల్లెట్ల వర్షం కురిపించారు. మన్నూ కూసా తుపాకీ నుంచే తొలి బుల్లెట్ వచ్చినట్లు పోలీసులు తెలిపారు.