భారత్ లో ఆందోళన కలిగిస్తున్న మంకీ పాక్స్ కేసులు

కరోనా వైరస్ భయం విడుతున్న సమయంలో యావత్తు ప్రపంచానికి మంకీ పాక్స్ భయం పట్టుకొంది. తాజాగా దేశంలో మంకీపాక్స్ వైరస్ కేసులు ఒక్కొక్కటిగా బయటపడుతున్నాయి. అలాగే, మంకీపాక్స్ వైరస్‌కు ఓ యువకుడు బలయ్యాడు. దేశంలో తొలి కేసు కేరళలో జులై 14న నమోదు కాగా.. అక్కడ మరో కేసు నిర్ధారణ అయ్యింది. యునైటెడ్ అరబ్ ఎమిరైట్స్ నుంచి వచ్చిన వ్యక్తికి మంకీపాక్స్ పాజిటివ్ వచ్చినట్టు కేరళ ప్రభుత్వం సోమవారం ధ్రువీకరించింది. దీంతో ఆ రాష్ట్రంలో మొత్తం మంకీపాక్స్ బాధితుల సంఖ్య ఐదుకు చేరింది. కొత్తగా నమోదయిన కేసు గురించి కేరళ ఆరోగ్య మంత్రి వీణ జార్జ్ ప్రకటన చేశారు. ‘‘యూఏఈ నుంచి వచ్చిన 30 ఏళ్ల వ్యక్తికి మంకీపాక్స్ వైరస్ పాజిటివ్ వచ్చింది.. ప్రస్తుతం అతడికి మలప్పురం ఆస్పత్రిలో చికిత్స కొనసాగుతోంది’’ అని వెల్లడించారు.

బాధితుడు జులై 27న యూఏఈ నుంచి కోజికోడ్ విమానాశ్రయానికి చేరకున్నాడని, మలప్పురంలోని మంజేరి మెడికల్ కాలేజీలో చికిత్స పొందుతున్నాడని తెలిపారు. ఇదిలావుంటే మంకీపాక్స్ లక్షణాలతో చనిపోయిన వ్యక్తితో కాంటాక్ట్ అయిన 20 మందిని ప్రస్తుతం త్రిసూర్ జిల్లా ఆస్పత్రిలో క్వారంటైన్ చేసినట్టు అధికారులు పేర్కొన్నారు. అయితే, బాధితుడు మాత్రం కుటుంబసభ్యులు, స్నేహితులు మొత్తం 10 మందిని కలిసినట్టు అధికారులు ధ్రువీకరించారు.

‘‘పరిస్థితి అదుపులోనే ఉంది.. ప్రస్తుతం ఎటువంటి ఆందోళన లేదు.. మంకీపాక్స్ లక్షణాలతో చనిపోయిన వ్యక్తి తన కుటుంబసభ్యులు, స్నేహితుల సహా కేవలం 10 మందితో కాంటాక్ట్ అయ్యాడు.. ఇప్పటి వరకూ 20 మందిని క్వారంటైన్‌లో ఉంచాం’’ అని కేరళ ఎడ్యుకేషన్ అండ్ హెల్త్ స్టాండింగ్ కమిటీ సభ్యుడు రెంజినీ అన్నారు.

మరోవైపు, దేశ రాజధాని ఢిల్లీలోనూ మంకీపాక్స్ వైరస్ రెండో కేసు నమోదయ్యింది. దీంతో దేశంలో ఇప్పటి వరకూ మంకీపాక్స్ బాధితుల సంఖ్య ఏడుకు చేరింది. ఢిల్లీలో ఓ 35 ఏళ్ల నైజీరియన్‌కు గత ఐదు రోజులుగా శరీరంపై దద్దర్లు, జ్వరం రావడంతో లోక్ నాయక్ ఆస్పత్రిలో చేరాడు. బాధితుడి రక్త నమూనాలను పుణేలోని నేషనల్ ఇన్‌స్టిట్యూట్ ఆఫ్ వైరాలజీ (ఎన్‌ఐవీ)కి పంపారు. సోమవారం వచ్చిన రిపోర్టులో అతనికి వైరస్ పాజిటివ్‌గా తేలింది. మరో ఇద్దరు ఆఫ్రికన్ జాతీయులు కూడా మంకీపాక్స్ అనుమానిత లక్షణాలతో ఇదే ఆస్పత్రిలో చికిత్స పొందుతున్నారు.

ఇక, స్మాల్‌పాక్స్‌కు కారణమయ్యే వైరస్ కుటుంబానికి చెందిన మంకీపాక్స్ వ్యాధి జంతువుల నుంచి మానవులకు సంక్రమించింది. పశ్చిమ ఆఫ్రికా వంటి ప్రాంతాల్లో ఈ వైరస్‌ ఎండ్‌మిక్ దశకు చేరింది. కానీ, ఈ కేసులు నాన్-ఎండ్‌మిక్ దేశాలకు వ్యాపించినట్టు ప్రపంచ ఆరోగ్య సంస్థ (డబ్ల్యూహెచ్ఓ) తెలిపారు.