5జీ సేవల కోసం...టెలికం ఎక్విప్‌మెంట్ లతో ఎయిర్ టెల్ ఒప్పందాలు

ఈ ఆగస్టు  నెలలోనే  ఎయిర్ టెల్  5జీ సేవలను అందుబాటులోకి తెచ్చేందుకు ప్రయత్నాలను మమ్మురం చేస్తోంది. ప్రముఖ టెలికం సంస్థ ఎయిర్‌టెల్‌ దేశంలో 5జీ నెట్‌వర్క్‌ను లాంచ్ చేసేందుకు సన్నద్ధమైంది. ఓవైపు రిలయన్స్ జియో కూడా ఈనెలలో 5జీ రోల్అవుట్‌ను మొదలుపెట్టేందుకు సన్నాహాలు చేసుకుంటోంది. ఈ తరుణంలోనే ఎయిర్‌టెల్‌ కూడా 5జీ రేస్‌లో ముందుండేందుకు రెడీ అయింది. ఇందుకోసం బుధవారం ఒప్పందాలను కూడా చేసుకుంది. దేశంలో 5జీ సర్వీస్‌లను అందించేందుకు టెలికం ఎక్విప్‌మెంట్ ప్రధాన సంస్థలైన ఎరిక్‌సన్ , నోకియా, సామ్‌సంగ్‌ లతో అగ్రిమెంట్ చేసుకుంది. ఈ విషయాన్న అధికారికంగా ప్రకటించింది.

5జీ స్పెక్ట్రమ్ వేలం ముగిసిన రెండు రోజుల తర్వాత 5జీ సర్వీస్‌ల రోల్‌అవుట్ గురించి ఎయిర్‌టెల్‌ ప్రకటన చేసింది. 19,868 ఎంహెచ్ జెడ్, ఎయిర్‌వేవ్స్ కోసం వేలంలో రూ.43,084 కోట్లను ఎయిర్‌టెల్‌ వెచ్చింది. ఇందులో కీలకమైన 3.5 జీహెచ్ జెడ్ , 26  బ్యాండ్స్ కూడా ఉన్నాయి. కాగా ఈ వేలంలో 24,740 ఎంహెచ్ జెడ్ ఎయిర్‌వేవ్స్‌ను రూ.88,078 కోట్లకు దక్కించుకున్న జియో అగ్రస్థానంలో అత్యధిక బ్యాండ్స్‌ను కైవసం చేసుకుంది. కాగా, ఇప్పుడు 5జీ రోల్అవుట్ గురించి ఎయిర్‌టెల్‌ అఫీషియల్ స్టేట్‌మెంట్ విడుదల చేసింది. వివరాలను వెల్లడించింది.

“ఆగస్టులోనే 5జీ సర్వీస్‌ల రోల్అవుట్‌ను ఎయిర్‌టెల్‌ ప్రారంభిస్తుందని ప్రకటించేందుకు సంతోషం వ్యక్తం చేస్తున్నాం. ఎక్కువ డేటా క్యాపబులిటీస్‌ను హ్యాండిల్ చేసేలా, 5జీ సర్వీస్‌లను అత్యంత వేగంతో అందించేలా, లో ల్యాటెన్సీ ఉండేలా ఎయిర్‌టెల్ 5జీని తీసుకొచ్చేందుకు భాగస్వామ్యాలు ఏర్పరుచుకున్నాం. దీంతో యూజర్లకు అద్భుతమైన ఎక్స్‌పీరియన్స్ ఉంటుంది” అని ఎయిర్‌టెల్‌ పేర్కొంది.

ఎయిర్‌టెల్‌తో సామ్‌సంగ్‌ జత కట్టడం ఇదే తొలిసారి. ఎరిక్‌సన్, నోకియాతో పార్ట్‌నర్‌షిప్‌ను కొనసాగించింది. 5జీ నెట్‌వర్క్ పరికరాలతో పాటు ఇతర సపోర్ట్ కోసం ఈ సంస్థలతో ఎయిర్‌టెల్‌ జత కట్టింది. ముందుగా దేశంలోని 12 ప్రధాన నగరాల్లో ఎయిర్‌టెల్‌ 5జీ సేవలను అందుబాటులోకి తెచ్చే అవకాశం ఉంది. ఇంతకాలం 4జీ నెట్‌వర్క్ కోసం జియోతో కలిసి సామ్‌సంగ్‌ పని చేసింది. భారత 5Gలో చైనా సంస్థల భాగస్వామ్యం ఉండకూడదని కేంద్ర ప్రభుత్వం నిబంధన విధించడంతో జెడ్‌టీఈని పక్కన పెట్టింది.

మరోవైపు రిలయన్స్ జియో కూడా ఇదే నెలలో 5జీ రోల్‌అవుట్‌ను ప్రారంభించాలని ఆలోచిస్తున్నట్టుగా తెలుస్తోంది. జియో కొత్త చైర్మన్ ఆకాశ్ అంబానీ ఇదే దిశగా సంకేతాలు ఇచ్చారు. అజాదీ కా అమృత్ మహోత్సవ్‌ను 5జీ రోల్అవుట్‌తో సంబరం చేసుకుందామని వ్యాఖ్యానించారు. అయితే ఈ విషయంపై జియో అధికారిక ప్రకటన విడుదల చేయలేదు. అయితే అతి త్వరలోనే వచ్చే అవకాశం ఉంది. 5జీ రోల్అవుట్ కోసం నోకియా, ఎరిక్‌సన్‌తో జియో చర్చిస్తోందని తెలుస్తోంది.