మనం ఏ మేర నగదును కలిగివుండొచ్చు

మనవద్ద  ఇబ్బడిమొబ్బడిగా నగదు ఉంచుకొంటే మాత్రం కష్టాలు వెంటాడుతాయి. దీనికి కారణాలు కూడా ఉన్నాయి. ఇదిలావుంటే ఆదాయపు పన్ను శాఖ, ఎన్‌ఫోర్స్‌మెంట్ డైరెక్టరేట్, సీబీఐ వంటి అతిపెద్ద దర్యాప్తు సంస్థలు ఇటీవల చేపడుతోన్న రైడ్స్ తెలిసినవే. దర్యాప్తు సంస్థలు జరిపే దాడుల్లో చాలా మంది ఇళ్లలో కోట్ల కొద్ది డబ్బులు గుట్టలు గుట్టలుగా పట్టుబడుతున్నాయి. పశ్చిమ బెంగాల్‌లో అర్పితా ముఖర్జి ఫ్లాట్‌ నుంచి ఈడీ రూ.50 కోట్ల నగదును సీజ్ చేసింది. ఇంతకుముందు కూడా ఇలాంటి యాక్షన్ చాలా మందిపైనే ఈడీ తీసుకుంది.

ఇలాంటి సమయంలో.. అసలు సాధారణ ప్రజలు ఎంత మొత్తంలో తమ ఇళ్లలో నగదును ఉంచుకోవచ్చు..? అనే ప్రశ్న ఉత్పన్నమవుతోంది. ఎంత మొత్తంలో నగదును సురక్షితంగా ఒకరు తమ ఇంట్లో దాచుకోవచ్చు.. ? ఇళ్లలో దాచి పెట్టుకునే నగదుకు ఇన్వెస్టిగేషన్ ఏజెన్సీ నుంచి ముప్పు ఉంటుందా.. ? అనే విషయాలను మనం ఇప్పుడు సవివరంగా తెలుసుకుందాం..

ఆదాయపు పన్ను డిపార్ట్‌మెంట్ నిబంధనల ప్రకారం.. మీ ఇంట్లో ఎంత మొత్తంలోనైనా మీరు నగదును ఉంచుకోవచ్చు. కానీ ఇన్వెస్టిగేషన్ ఏజెన్సీలో ఏమైనా నగదు పట్టుబడితే మాత్రం.. మీరు ఆ నగదు ఎక్కడి నుంచి వచ్చిందో.. ఆ సోర్స్‌ను చెప్పాల్సి ఉంటుంది. చట్టబద్ధంగా మీరు ఆ నగదును సంపాదిస్తే.. వాటికి పూర్తి డాక్యుమెంట్లు మీ వద్ద ఉండాలి. అంతేకాక ఆదాయపు పన్ను రిటర్నులు దాఖలు చేసి ఉండాలి. అప్పుడు మీరు భయపడాల్సినవసరం ఉండదు. ఒకవేళ సోర్స్ చెప్పలేని పరిస్థితులో మీరుంటే.. ఇన్వెస్టిగేషన్ ఏజెన్సీ మీపై చర్యలు తీసుకునే అవకాశం ఉంటుంది.

మీ ఇంట్లో దాచుకున్న నగదుకు మీరు సోర్స్ చెప్పడంలో విఫలమైతే.. 137 శాతం వరకు పెనాల్టీ కట్టాల్సి ఉంటుంది. ఒక ఆర్థిక సంవత్సరంలో నగదు రూపంలో రూ.20 లక్షల లావాదేవీలు దాటినా పెనాల్టీ వర్తిస్తుంది. ఒకేసారి రూ.50 వేలకు మించి నగదును విత్ డ్రా చేయాలన్నా లేదా డిపాజిట్ చేయాలన్నా పాన్ కార్డు తప్పనిసరి అని సీబీడీటీ తెలిపింది. ఒక ఏడాదిలో రూ.20 లక్షల నగదును డిపాజిట్ చేస్తే.. పాన్, ఆధార్ కార్డు వివరాలు ఇవ్వాలి. పాన్ కార్డు, ఆధార్ నెంబర్ వివరాలను ఇవ్వడంలో విఫలమైతే.. రూ.20 లక్షల వరకు పెనాల్టీ ఉంటుంది. రూ.2 లక్షలకు మించి నగదు రూపంలో కొనుగోళ్లు చేయకూడదు. రూ.2 లక్షలకు మించి నగదు రూపంలో కొనుగోళ్లు చేస్తే.. పాన్, ఆధార్ కార్డు కాపీలను సమర్పించాలి. రూ.30 లక్షలకు మించి నగదు రూపంలో ఏదైనా ప్రాపర్టీని కొన్నా అమ్మినా కూడా మీరు ఇన్వెస్టిగేషన్ ఏజెన్సీ కనుసన్నల్లోకి వచ్చేస్తారు. క్రెడిట్, డెబిట్ కార్డు పేమెంట్లు చేసేటప్పుడు.. ఒకేసారి లక్షకు మించి పేమెంట్ చేస్తే.. మీరు ఇన్వెస్టిగేషన్ ఎదుర్కొనే అవకాశం ఉంటుంది. నగదు రూపంలో విరాళాలు ఇచ్చే పరిమితిని రూ.2 వేలకు నిర్ణయించారు. ఒక వ్యక్తి రూ.20 వేలకు మించి లోన్‌ను నగదు రూపంలో మరో వ్యక్తి నుంచి తీసుకోకూడదు. బ్యాంకు నుంచి రూ.2 కోట్లకు పైగా నగదు విత్‌డ్రాయల్ చేపడితే టీడీఎస్ వర్తిస్తుంది.