ఉరి సినిమాకు నో చెప్పబోయాను: విక్కీ

ఒక సినిమాతో మన జీవితమే మారిపోవచ్చు. అది చిన్న సినిమా అవ్వచ్చు లేదా భారీ బడ్జెటెడ్ ఫిలిం అయినా అవ్వచ్చు. బాలీవుడ్ నటుడు విక్కీ కౌశల్‌ జీవితం కూడా ఒక్క సినిమాతో దశ తిరిగింది. అదే.. ‘ఉరి- ది సర్జికల్ స్ట్రయిక్స్’. పాకిస్థానీ ఉగ్రవాదులు మన భారత్‌లోకి చొరబడి దాడులు జరిపి ఎంతో మంది జవాన్లను పొట్టనబెట్టుకున్నారు. దాంతో ప్రతీకార చర్యగా భారత్.. దాయాదిపై సర్జికల్ స్ట్రయిక్స్ నిర్వహించిన సంగతి తెలిసిందే. ఈ కథ ఆధారంగా ‘ఉరి-ది సర్జికల్ స్ట్రయిక్స్’ సినిమాను దర్శకుడు ఆదిత్య ధర్ తెరకెక్కించారు. మన దేశ గొప్పతనం గురించి నిజాయతీగా చాటి చెప్పిన ఈ చిత్రం బ్లాక్ బస్టర్ విజయం అందుకుంది. ఈ సినిమాతో విక్కీ కౌశల్‌కు జాతీయ అవార్డు వరించింది. అతన్ని అగ్ర హీరోల్లో ఒకరిగా నిలిపింది. అయితే ఈ సినిమా అవకాశం తనకు వచ్చినప్పుడు దాదాపుగా నో చెప్పబోయాడట విక్కీ. ఈ విషయాన్ని ఆయన ఓ ఇంటర్వ్యూలో వెల్లడించారు. ‘నేను ఉరి సినిమాకు నో చెప్పబోయాను. ఎందుకంటే ఆ సమయంలో నేను ‘రాజి’ సినిమా షూటింగ్‌లో ఉన్నాను. అప్పుడు నాకు నిర్మాత రోన్నీ నుంచి ఫోన్ వచ్చింది. ఓ యాక్షన్ సినిమా స్క్రిప్ట్ పంపుతున్నాను చదవండి అన్నారు. ఈ స్క్రిప్ట్ ఇంతవరకు ఏ హీరోకు ఇవ్వలేదు అన్నారు. ఆ సమయంలో నేను రాజిలో ఓ ఎమోషనల్ సన్నివేశంలో పాల్గొన్నాను. దాంతో నాకు మైండ్ పనిచేయకుండా పోయింది. చాలా డిస్టర్బ్‌డ్‌గా ఉన్నాను. ఇంటికి వెళ్లాక స్క్రిప్ట్ చదివాను. సర్జికల్ స్ట్రయిక్స్ గురించి అని అర్థమైంది. అయితే నాకు సర్జికల్ స్ట్రయిక్స్ గురించి పూర్తిగా తెలీదు. దాంతో తెలుసుకుందామని స్క్రిప్ట్ మొత్తం చదవాలనుకున్నాను. కానీ అప్పటికే చాలా అలసిపోయాను. దాంతో నాలుగు గంటల పాటు స్క్రిప్ట్ చదివినా నాకు అర్థం కాలేదు. ఎందుకంటే స్క్రిప్ట్‌లో ఆర్మీ భాష ఎక్కువగా ఉంది. అదీకాకుండా రాజీ సినిమాలో నేను పాకిస్థానీ ఆఫీసర్‌గా నటించాను’. ‘సడెన్‌గా ఉరి స్క్రిప్ట్ చూసి నేను ఇండియన్ ఆఫీసర్‌ పాత్రలో నటించాలని ఉంది. దాంతో అసలు కనెక్ట్ చేసుకోలేకపోయాను. మరుసటి రోజు నేను రాజీ షూటింగ్‌కు వెళ్లిపోయాను. అప్పుడు ఇంట్లో ఉన్న ఉరి స్క్రిప్ట్‌ను మా నాన్న చదివారు. నేను ఇంటికి వచ్చాక ఆ స్క్రిప్ట్ గురించి ఏం ఆలోచించావ్ అని అడిగారు. నేను ఆ జోన్‌లోకి వెళ్లలేకపోతున్నాను అని చెప్పా. సాధారణంగా నాకు ఏదన్నా స్క్రిప్ట్ ఇస్తే రెండు గంటల్లో పూర్తి చేస్తాను. కానీ ఉరి స్క్రిప్ట్ మాత్రం నాలుగు గంటలు పట్టింది. ఈ సినిమా నువ్వు చేయకపోతే ఇంతకంటే స్టుపిడ్ నిర్ణయం మరొకటి ఉండదు అని నాన్న అన్నారు. అప్పుడు నేను మరోసారి ఆ స్క్రిప్ట్ చదవాలని అనుకున్నాను. గంటన్నర పాటు స్క్రిప్ట్ చదివాను. చదివాక వెంటనే రోన్నీకి ఫోన్ చేసి ఈ సినిమా నేను తప్పకుండా చేస్తాను, దయచేసి మరో హీరోను సంప్రదించవద్దు అని చెప్పారు’ అన్నారు. నిజంగానే ఈ స్క్రిప్ట్ వదులుకుని ఉంటే విక్కీ ఎంత పశ్చాత్తాపపడేవాడో ప్రత్యేకంగా చెప్పలేదు. ఎందుకంటే ఈ సినిమా వల్లే విక్కీలో ఉన్న గొప్ప నటుడు బయటపడ్డాడు. ఈ సినిమా వల్లే ఆయనకు జాతీయ అవార్డు వచ్చింది. ఒకవేళ చేయకపోయి ఉంటే మాత్రం విక్కీ కేవలం ఓ బాలీవుడ్ నటుడిగానే మిగిలిపోయి ఉండేవాడు.