నాకు విస్కీ అంటే పిచ్చి: శ్రుతి హాసన్

తనకున్న తాగుడు అలవాటు గురించి మాట్లాడి హాట్ టాపిక్‌గా మారింది శ్రుతి హాసన్. తనకు తాగే అలవాటు ఉందని, ఆ తర్వాత అనారోగ్య సమస్యలు రావడంతో మానేశానని చెప్పింది. దాంతో శ్రుతి తాగుబోతు అని నెటిజన్లు ట్యాగ్ జత చేసేశారు. అయితే తాను తాగుబోతునని చెప్పలేదని, తన మాటలను అభిమానులు తప్పుగా అర్థం చేసుకున్నారని అంటున్నారు. ప్రముఖ నటి మంచు లక్ష్మి హోస్ట్ చేస్తున్న ‘ఫీట్ అప్ విత్ ది స్టార్స్’ షోలో ఇటీవల శ్రుతి పాల్గొన్నారు. తన లవ్ లైఫ్ గురించి, సినిమాల గురించి ఎన్నో విషయాలు పంచుకున్నారు. ‘నాకు విస్కీ అంటే పిచ్చి. కానీ తాగుడుకు కాస్త బ్రేకిచ్చా. ఇది నాలో వచ్చిన కొత్త మార్పు. తాగడం వల్ల అనారోగ్యానికి గురయ్యాను. కానీ ఈ విషయం గురించి నేను ఎవ్వరికీ చెప్పలేదు. ఎందుకంటే అది నా పర్సనల్ విషయం. అందుకే నా అనారోగ్యం గురించి ఎవ్వరికీ చెప్పకూడదని అనుకున్నాను. ఆ తర్వాత ట్రీట్‌మెంట్ తీసుకున్నాను’ అంది. అయితే ఆమె మాటలు జనాలకు సరిగ్గా అర్థంకాలేదని తనను తాగుబోతు అంటున్నారని శ్రుతి తలబాదుకుంటున్నారు. తన గురించి తప్పుగా అనుకోకముందే ఓ ఆంగ్ల మీడియా ద్వారా తన మాటలకు అర్థాన్ని వెల్లడించారు. ‘చాట్ షోలో నేను ఇక తాగను అని చెప్పాను. కానీ నా మాటలను అందరూ తప్పుగా అర్థం చేసుకున్నారు. ఈరోజుల్లో తాగడం అనేది చాలా కామన్. అందులో తప్పేముంది? కానీ నేను మాత్రం ఇక తాగదలచుకోలేదు. తాగేవారిని నేను అస్సలు తప్పుబట్టను. కానీ తాగేవారు మాత్రం ఆ విషయాన్ని బయటపెట్టరు. అలా ఎందుకు చేస్తారో నాకు తెలీదు. జీవితంలో ఎప్పుడైనా తాగారా అని అడిగిన ప్రశ్నకు కూడా సమాధానం చెప్పరు. 2019లో ఉంటూ ఇంకా తాగే అలవాటు లేదనడం చెత్తగా ఉంది. అలాంటప్పుడు నేను తాగడం మానేశాను ఇంకెప్పుడూ తాగాలని అనుకోవడంలేదు అని నేను ధైర్యంగా చెప్పినప్పుడు తప్పుగా ఎందుకు అర్థం చేసుకుంటున్నారో నాకు అర్థం కావడంలేదు’ అని వెల్లడించారు శ్రుతి.