శ్రీముఖినే నమ్ముకున్నారు.. తేడా కొట్టింది
cinema | Suryaa Desk | Published : Sat, Dec 16, 2017, 09:16 AM
బుల్లితెరపై మంచి క్రేజ్ ను కలిగి ఉన్న వాళ్ల ను పెట్టి సినిమాలు చేసేస్తే కలెక్షన్ల వర్షం కురుస్తుంది.. అని మూవీ మేకర్లు ఎవరైనా నమ్ముతుంటే ఆ నమ్మకాలను వదిలించుకునే సమయం ఇదేనేమో. జబర్దస్త్ రేష్మీని నమ్ముకుని ప్రవీణ్ సత్తారు ‘గుంటూర్ టాకీస్’ అంటూ హిట్టు కొట్టేసరికి... క్రేజీ యాంకర్లను పెట్టి సినిమాలు చుట్టేస్తే కాసులు వచ్చేస్తాయని చాలా మంది అనుకున్నారు. అందులో భాగంగా రేష్మీని అడ్డం పెట్టుకుని పలు సినిమాలు వచ్చాయ్.. వెళ్లాయ్.
కేవలం రేష్మీని మాత్రమే కాకుండా.. మరో క్రేజీ యాంకర్ రేష్మీని కూడా రచ్చలోకి లాగారు. ఈ పరంపరలో వచ్చిన సినిమానే ‘కుటుంబకథా చిత్రమ్’. ప్రేమకథా చిత్రమ్ హిట్టైందని.. దానికి రివర్స్ లో ఈ టైటిల్ ను పెట్టినట్టుగా ఉన్నారు. ఇక్కడ క్రియేటివిటీ బాగానే ఉపయోగించారు కానీ..అసలైన కథ, కథనాల విషయంలో మాత్రం ఈ సినిమా మేకర్లు ఏ మాత్రం కసరత్తు చేయలేదని తెలుస్తోంది.
అలా చేస్తే ఫలితం ఏమవుతుందో వేరే చెప్పనక్కర్లేదు. నిన్న శుక్రవారం డజనుకు పైగా సినిమాలు విడుదల అయితే.. వాటిల్లో ఈ సినిమా కూడా ఒకటి. మిగతా సినిమాలనూ ఎవ్వరూ పట్టించుకోలేదు.. ఈ సినిమాను కూడా ఎవ్వరూ పట్టించుకలేదు. శ్రీముఖి నటించడంతో సినిమాకు క్రేజ్ వస్తుందని, వసూళ్లు వస్తాయని అనుకుంటే అలాంటి దాఖలాలు కూడా కనిపించడం లేదు. యాంకర్ల క్రేజీ నెస్ తో సినిమాలు హిట్టు కావు.. కథా, కథనాలే ఇంపార్టెంటు అనే విషయాన్ని మరోసారి చాటి చెబుతోంది ఈ కుటుంబ కథా చిత్రమ్.
|
|