చరణ్ సలహా తీసుకున్నా…సాయి తేజ్

వేసే ప్రతి అడుగులో, చేసే ప్రతి చిత్రంలో తాను మెగాస్టార్‌ కుటుంబం నుంచి వచ్చానని గుర్తుపెట్టుకుంటానని అంటున్నారు సాయి ధరమ్‌ తేజ్‌. ఈ యువ హీరో నటిస్తున్న కొత్త సినిమా ప్రతిరోజూ పండగే. మారుతి దర్శకత్వం వహిస్తున్నారు. జీఏ2, యూవీ క్రియేషన్స్‌ సంయుక్తంగా నిర్మిస్తున్నాయి. రాశీ ఖన్నా నాయిక. ఈ శుక్రవారం ప్రతి రోజూ పండగే ప్రేక్షకుల ముందుకొస్తోంది. ఈ సందర్భంగా చిత్ర విశేషాలను తేజ్‌ వివరించారు..

శతమానం భవతి సినిమాకు మా చిత్రానికి పోలిక లేదు. అందుకే ట్రైలర్‌లో ఓ సంభాషణ చెప్పించడం ద్వారా స్పష్టత ఇచ్చాం. దర్శకుడు మారుతి నాకు చాలా కాలంగా మిత్రుడు. అప్పటికి నేను సినిమాల్లోకి రావాలని అనుకోలేదు. తను గ్రాఫిక్స్‌ పనులు చేసేవాడు. నాకు సరదగా ఒక కథ చెప్పాడు. పదేళ్ల క్రితం సంగతి ఇది. నేనేదో విన్నా కానీ, ఇవాళ నిజంగా హీరోగా మారి, మారుతి దర్శకత్వంలో సినిమా చేస్తానని అనుకోలేదు.

వ్యక్తిగత జీవితాల కారణంగా ఇప్పుడు పెద్ద కుటుంబాలు లేవు. అన్నీ చిన్న కుటుంబాలే. బతుకుతెరువు కోసం ప్రతి ఒక్కరూ ఎక్కడెక్కడికో వెళ్లి బతుకుతున్నారు. మరికొందరు దేశం వదిలి వెళ్లపోయారు. అలాంటి ఓ కుటుంబంలోని తాతా మనవడి కథే ఈ సినిమా.

నా తొలి చిత్రం కోసం సిక్స్‌ ప్యాక్‌ చేశాను, మధ్యలో బరువు పెరిగాను. చిత్రలహరి సినిమాకు దాదాపు వంద కిలోలకు వచ్చేశాను. ఇలా ఉంటే కష్టమని అనుకుని, తగ్గడం మొదలుపెట్టాను. రోజూ తినడం తగ్గించినా ఫలితం లేదు. నేను చేసే వ్యాయామాలు చూసిన చరణ్‌, నువ్వు చేస్తున్నది సరిపోదు అంటూ ఓ ఫిట్‌నెస్‌ ట్రైనర్‌ను ఇచ్చాడు. మంచి సలహాలు ఇచ్చాడు.

కుటుంబంతో కలిసుంటే ప్రతిరోజూ పండగే అని చెబుతున్నాం. ఇది సందేశాత్మక కథ. అయితే వినోదాన్ని అందిస్తూ సాగుతుంది. దర్శకులు మారుతి ఈ విషయంలో జాగ్రత్త తీసుకున్నారు. సినిమా ఉగాది పచ్చడిలా ఉంటుంది. ఈ చిత్రంలో నటిస్తున్నప్పుడు మా కుటుంబ సభ్యులు గుర్తొచ్చారు.

నటుడిగా ప్రతి అనుభవం విలువైనదే. నేను గతంలో కొన్ని చిత్రాలు చేసి తప్పు అడుగేశాను. ఇప్పుడు వాటి నుంచి నేర్చుకుంటూ మంచి కథలు ఎంచుకుంటున్నా. చిత్రలహరి సినిమా మంచి కథ, అయితే ఎందుకో ఆదరణ పొందలేదు. ఆ సినిమాలో నటిస్తున్నంత సేపూ ఆ పాత్ర నుంచి బయటకు రాలేకపోయాను.

మెగాస్టార్‌ చిరంజీవి గారి కుటుంబ సభ్యుడు అవడం నా అదృష్టం. వాళ్ల సినిమాలు చేయడంలో ఒక స్థాయిని అందుకున్నారు. ఆ స్థాయికి అగౌరవం రాకుండా ఉండే సినిమాలు చేయాలనుకుంటున్నాను.

ప్రస్తుతం సోలో బతుకే సో బెటరు అనే చిత్రంలో నటిస్తున్నా. ఈ సినిమా 22 నుంచి 32 ఏళ్ల మధ్య వయసులో సాగే యువకుడి కథ. ప్రతి యువత జీవితాలకు అద్దంలా ఉంటుంది. మల్టిdస్టారర్స్‌కు నేను సిద్ధమే. రవితేజ గారు కలిసినప్పుడు మనం సినిమా చేయాలబ్బాయ్‌ అంటుంటారు. వరుణ్‌తో కలిసి నటించేందుకు ఆసక్తిగా ఉన్నాను.