'పంజా' ఫ్లాప్ కావడం కెరీర్ పై ప్రభావం చూపింది: నికిషా పటేల్
cinema | Suryaa Desk | Published : Sun, Mar 29, 2020, 12:06 PM
తన తొలి తెలుగు చిత్రమే పవన్ కల్యాణ్ పక్కన చేయడంతో ఎంతో మంది నా అదృష్టాన్ని చూసి కుళ్లుకున్నారని, అయితే, అదృష్టంతో పాటే దురదృష్టం కూడా వెన్నాడిందని, ఆ సినిమా సరిగ్గా ఆడకపోవడంతో ఆ ప్రభావం తన కెరీర్ పై పడిందని 'పంజా' హీరోయిన్ నికిషా పటేల్ వాపోయింది. తాజాగా ఓ ఇంటర్వ్యూ ఇచ్చిన ఆమె, పెద్ద హీరోలతో సినిమాలు చేయాలని వచ్చిన తాను, ఆ కల ఫలించక పోగా, సర్దుకుపోయి, కొన్ని బడ్జెట్ సినిమాలు చేశానని, అది తన కెరీర్ కు మైనస్ గా మారిందని తెలిపింది.కొందరు తాను కాంప్రమైజ్ అయితే, మరిన్ని అవకాశాలు వస్తాయని సలహాలు ఇచ్చారు. కానీ, ఆ విషయంలో తాను దిగజారలేదని, తనకు మంచి అవకాశాలు రాకపోవడానికి ఇది కూడా ఓ కారణమని నమ్ముతున్నానని చెప్పింది. అయితే, ఇండస్ట్రీకి వచ్చే ప్రతి ఒక్కరికీ ఇదే అనుభవం ఎదురవుతుందని భావించడం లేదని, వారసత్వంగా వచ్చే వారికి, గుర్తింపు తెచ్చుకుని పాప్యులర్ అయిన వారికీ మినహాయింపు ఉంటుందని చెప్పుకొచ్చింది. కొందరు నూతన హీరోయిన్లకు ఏ మాత్రమూ విలువ ఇవ్వరని, సినీ పరిశ్రమకు ఎందుకు వచ్చామా? అని బాధపడేలా ప్రవర్తిస్తారని వాపోయింది.ఇక తన పెళ్లిపై వస్తున్న వార్తలపై స్పందిస్తూ, తాను వివాహం చేసుకోవాలని భావిస్తే, అందరికీ చెప్పే చేసుకుంటానని, చెప్పకుండా చేసుకోబోనని వ్యాఖ్యానించింది. తనకు గతంలో ఓ బాయ్ ఫ్రెండ్ ఉండేవాడని, అతనికి తాను సినిమాల్లో నటించడం ఇష్టం లేదని, దీంతో బ్రేకప్ చెప్పి వెళ్లిపోయాడని వెల్లడించిన నికిషా, అప్పటి నుంచి తనకు ప్రేమ, పెళ్లిపై నమ్మకం పోయాయని తెలిపింది.
|
|