ట్రెండింగ్
ధనుష్ హాలీవుడ్ మూవీ టీజర్ వచ్చేసింది
cinema | Suryaa Desk | Published : Sat, Feb 10, 2018, 12:38 PM
దక్షిణాది చిత్ర పరిశ్రమతోపాటు బాలీవుడ్లోనూ సత్తా చాటిన విలక్షణ నటుడు, తమిళ హీరో ధనుష్ హాలీవుడ్లో తెరంగేట్రం చేసాడన్న సంగతి తెలిసిందే. ఇప్పటికే ఇండియన్ నటీనటులు హాలీవుడ్ తెరపై మెరిసారు. అనిల్ కపూర్, ప్రియాంక చోప్రా, దీపికా పడుకునే, ఓంపురి, సోనూ సూద్, గుల్షన్, ఇర్షాన్, అమైరా దస్తూర్ ఇలా ఇండియన్ నటీనటులంతా అదృష్టం కలిసొచ్చి హాలీవుడ్ మెట్లు ఎక్కారు. ఆ అదృష్టం ధనుష్ కి కూడా రాగా, ' ద ఎక్స్ టార్డనరీ జర్నీ ఆఫ్ ద ఫకీర్' అనే పేరుతో తెరకెక్కుతున్న చిత్రంలో ధనుష్ హాలీవుడ్ హీరోయిన్లు ఉమా తుర్మన్, అలెగ్జాండ్రా దడారియోలతో జతకట్టాడు. రొమైన్ ప్యూర్తొలా రాసిన 'ద ఎక్స్ట్రార్డినరీ జర్నీ ఆఫ్ ద ఫకీర్ హూ గాట్ ట్రాప్డ్ ఇన్ యాన్ ఐకియా వార్డ్రోబ్' పుస్తకం ఆధారంగా కెనడియన్ స్క్రిప్ట్ రైటర్ కమ్ డైరెక్టర్ కెన్ స్కాట్ ఈ చిత్రాన్ని తెరకెక్కించారు. ఈ చిత్ర షూటింగ్ ఇండియా, ఫ్రాన్స్, ఇటలీ, మొరాకోలలో జరిగినట్టు సమాచారం.
హాలీవుడ్ చిత్రంలో ధనుష్.. అజాతశత్రు లావాష్ పటేల్ పాత్రలో కనిపించనున్నాడు. ఎమోషనల్ అండ్ కామెడీ డ్రామాగా ఈ చిత్రం తెరకెక్కింది. మే 30న ఇంగ్లీష్తో పాటు ఫ్రెంచ్లో ఈ చిత్రం విడుదల కానుంది. ముంబైకి చెందిన కుర్రాడి పాత్రలో ధనుష్ కనిపించనుండగా, లోకజ్ఞానం తెలియక కన్నతల్లిని విడిచి ఉండలేని పటేల్ కొన్ని పరిస్థితుల రిత్యా ప్రపంచ యాత్రకు బయలుదేరుతాడు. ఈ క్రమంలో అతను ఎదుర్కునే పరిస్థితులు.. సాహసాలు, మధ్యలో ప్రేమ కథ సాగుతుంది. కొద్ది సేపటి క్రితం చిత్ర టీజర్ విడుదల చేశారు. దర్శకుడు పాత్ర గురించి వివరిస్తున్న సమయంలోనే కొన్ని సన్నివేశాలు చూపించారు. ఈ సినిమాలో హీరో కోసం ఎన్నో ఇండియన్ సినిమాలు చూశానని చెప్పిన కెన్ స్కాట్ ఆ పాత్రకి ధనుష్ అయితేనే సరిగ్గా సరిపోతాడని భావించి సెలక్ట్ చేశామని అన్నాడు. ఏ విషయాన్నైన క్షుణ్ణంగా పరిశీలించే ధనుష్ ఓ మేధావి అంటే ప్రశంసలు కురిపించాడు. మరి తాజాగా విడుదలైన ద ఎక్స్ టార్డనరీ జర్నీ ఆఫ్ ద ఫకీర్ టీజర్పై మీరు ఓ లుక్కేయండి.
|
|