కీర్తి జోరు మాములుగా లేదుగా.. మరో సినిమాలో అవకాశం

కీర్తి సురేష్... రామ్ పోతినేని నటించిన నేను శైలజా చిత్రంతో తెలుగు సినీరంగ ప్రవేశం చేసింది. ఆ తర్వాత నేను లోకల్, అజ్ఞాతవాసి, మహానటి, మిస్ ఇండియా, రంగ్ దే, గుడ్ లక్ సఖి వంటి చిత్రాలతో తెలుగు ప్రేక్షకులకు మరింత చేరువయ్యింది. ప్రస్తుతం తెలుగులో  సూపర్ స్టార్ మహేష్ బాబు నటిస్తున్న సర్కారు వారి పాట, నాని దసరా చిత్రాలలో నటిస్తుంది. ఇంకా మెహర్ రమేష్ దర్శకత్వం వహిస్తున్న  భోళా శంకర్ సినిమాలో మెగాస్టార్ చిరంజీవికి చెల్లెలిగా కూడా నటిస్తుంది కీర్తి. ఇంకా తమిళ, మలయాళ భాషలలో కూడా పలు సినిమాలను చేస్తూ బిజీగా ఉన్న కీర్తి మరో తెలుగు సినిమాలో అవకాశం కొట్టేసిందని వార్తలు వస్తున్నాయి. 

ఆడవాళ్లు మీకు జోహార్లు సినిమాతో ఫర్వాలేదనిపించుకున్నా,గట్టి హిట్ కోసం ఇంకా ఎదురుచూస్తూనే ఉన్నాడు టాలీవుడ్ టాలెంటెడ్ హీరో శర్వానంద్. ఆ సినిమా తర్వాత కృష్ణ చైతన్య దర్శకత్వంలో ఒక సినిమా చేయటానికి రెడీ అవుతున్నాడు. ఈ సినిమాలో ఒక బిడ్డకి తండ్రిగా నటించనున్న శర్వానంద్ పక్కన తొలుత కృతి శెట్టి ని హీరోయిన్గా అనుకున్నా, ఆమె నో చెప్పటంతో ఈ అవకాశం కీర్తి సురేష్ ను వరించిందని చిత్రవర్గ సమాచారం. 

సాధారణంగా యంగ్ హీరోయిన్ లు తల్లి,చెల్లి, అక్క, వదిన... ఇలాంటి పెద్ద తరహా పాత్రలను చేయటానికి అంతగా ఇష్టపడరు. ఆ కోవలోనే ఉప్పెన ఫేమ్ కృతిశెట్టి కూడా జాయిన్ అయ్యింది. కానీ కీర్తి సురేష్ మాత్రం అందుకు భిన్నం. ఇప్పటికే పెంగ్విన్ చిత్రంలో తల్లిగా, రజినీకాంత్ అన్నాత్తే సినిమాలో రజినీ చెల్లిగా నటించి మంచి మార్కులు కొట్టేసింది. ఇప్పుడు తాజాగా శర్వానంద్ కొత్త సినిమాలో తల్లిగా నటించటానికి కూడా ఒప్పుకుని తన ప్రత్యేకతను చాటుకుంటుంది.