ఈ ఏడాది చివర్లోనే ప్రభాస్-మారుతీ మూవీ...?

బాహుబలి సినిమా ఇచ్చిన దేశవ్యాప్త క్రేజుతో వరసగా పాన్ ఇండియా ప్రాజెక్టులు చేస్తూ ఫుల్ బిజీగా ఉన్నాడు రెబల్ స్టార్ ప్రభాస్. మొన్నటివరకు ప్రభాస్ ఓం రౌత్ డైరెక్షన్లో రూపొందుతున్న ఆదిపురుష్ కోసం కష్టపడితే, తాజాగా ప్రాజెక్ట్ కే కోసం షూటింగ్ చేస్తున్నాడు. ప్రస్తుతం మోకాలి సర్జరీతో విశ్రాంతి తీసుకుంటున్న ప్రభాస్ వచ్చే నెల్లోనే షూటింగ్ లో పాల్గొంటాడని వినికిడి. కేజీఎఫ్ సినిమాతో సంచలన దర్శకుడిగా మారిన ప్రశాంత్ నీల్ డైరెక్షన్లో ప్రభాస్ చేస్తున్న సలార్ తో పాటు నాగ్ అశ్విన్ డైరెక్షన్లో అత్యంత భారీ సాంకేతికవిజ్ఞానికతో తెరకెక్కుతున్న ప్రాజెక్ట్ కే షూటింగులు ఒకేసారి చేయనున్నాడు ప్రభాస్. 

అయితే... వరసగా పాన్ ఇండియా సినిమాలు చేస్తుండటంతో తెలుగు వారికి దూరం అవుతున్నానేమో అని భావించిన ప్రభాస్ ఒక వినూత్న ఆలోచన చేసాడు. టాలీవుడ్లో వేగంగా సినిమాలు చేసే మారుతితో ఒక చిన్న సినిమా చేసి కమర్షియల్ హిట్ కొట్టాలని ఆశపడుతున్నాడట. ఇందుకు ప్రధాన కారణం ఎన్నో అంచనాల మధ్య ఆయన నటించిన రాధేశ్యామ్ బిగ్ ఫెయిల్యూరే అని తెలియకనే తెలుస్తుంది. పోతే... మారుతీ-ప్రభాస్ సినిమాకి రాజా డీలక్స్ అనే టైటిల్ ప్రచారంలో ఉంది. శరవేగంగా షూటింగ్ జరిపి ఈ ఏడాది చివరికల్లా మూవీ ని రిలీజ్ చెయ్యాలని చిత్రబృందం ప్లాన్ చేస్తుందట. ఇదంతా బాగానే ఉంది కానీ, మారుతి డైరెక్షన్లో ప్రభాస్ చేస్తున్న చిన్న సినిమాకైనా కనీసం 50 రోజులు కేటాయించాల్సి ఉంటుంది.  తన బిజీ పాన్ ఇండియా మూవీ షూటింగ్ల మధ్య ప్రభాస్ మారుతీ సినిమాకు 50రోజులు కేటాయించటమంటే అంత సులభమేమీ కాదు. అలా చూసుకుంటే ప్రభాస్ మారుతీ సినిమా కోసం అధికంగా కష్టపడాల్సి ఉంటుంది.