కేజీఎఫ్ లో ఇనాయత్ ఖలీల్ పాత్రను పోషించింది ఎవరో తెలుసా...!
cinema | Suryaa Desk | Published : Wed, Apr 20, 2022, 12:30 PM
ఇటీవల విడుదలైన కేజీఎఫ్ 2 చిత్రం బాక్సాఫీస్ వద్ద వసూళ్ల సునామీని తీసుకొస్తుంది. విడుదలైన నాలుగు రోజుల్లోనే ఈ యాక్షన్ డ్రామా ప్రపంచవ్యాప్తంగా రూ. 500 కోట్లను సాధించింది. ప్రశాంత్ నీల్ డైరెక్ట్ చేసిన ఈ చిత్రంలో రాకింగ్ స్టార్ యష్, శ్రీనిధిశెట్టి, సంజయ్ దత్, రవీనా టాండన్, ప్రకాష్ రాజ్, రావు రమేష్ తదితరులు కీలక పాత్రలు పోషించారు.
అయితే... ఈ మూవీలో ఇనాయత్ ఖలీల్ అనే కీలక పాత్రను ఒక తెలుగు నటుడు పోషించాడని మీకు తెలుసా! బిగ్ బాస్ మొదటి సీజన్ లో రన్నరప్ గా నిలిచి, అశేష తెలుగు ప్రేక్షకుల అభిమానాన్ని చూరగొన్న ఆదర్శ్ బాలకృష్ణ తండ్రి బాలకృష్ణ నీలకంఠాపురం కేజీఎఫ్ 2 లో పవర్ఫుల్ ఇనాయత్ ఖలీల్ పాత్రను ఎంతో గంభీరంగా, హుందాగా పోషించారు. ఈ పాత్రను బాలకృష్ణ పోషించాడని కొంతమందికి తెలిసుండచ్చేమో గానీ ఆయన ఆదర్శ్ తండ్రి అని అంతగా ఎవరికీ తెలియదు. తన తండ్రికి శుభాకాంక్షలను తెలియజేస్తూ... ఆదర్శ్ చేసిన ట్వీట్ తో ఈ వార్త అందరికి తెలిసి వైరల్ గా మారింది. 65ఏళ్ళ వయసులో సినిమా అవకాశాలను చేజిక్కించుకుని, ఇనాయత్ ఖలీల్ అనే బరువైన పాత్రకు నూరు శాతం న్యాయం చేసిన తన తండ్రి పట్ల చాలా గర్వంగా ఫీల్ అవుతున్నాని, ఈ క్రెడిట్ అంతా దర్శకుడు ప్రశాంత్ కే చెందుతుందని ఆదర్శ్ ట్వీట్ చేసాడు. అందరికీ తెలియని ఇంకో రహస్యమేంటంటే, ఆదర్శ్, ప్రశాంత్ నీల్ వరసకు కజిన్స్ అవుతారు.
|
|