దర్శకుడు కనీస హోమ్ వర్క్ కూడా చేయని సినిమా- బీస్ట్ పై విజయ్ తండ్రి వ్యాఖ్యలు
cinema | Suryaa Desk | Published : Wed, Apr 20, 2022, 04:04 PM
వరుణ్ డాక్టర్ ఫేమ్ నెల్సన్ దిలీప్ కుమార్ దర్శకత్వంలో తమిళ స్టార్ హీరో విజయ్ నటించిన చిత్రం బీస్ట్. పూజా హెగ్డే కధానాయిక. అనిరుధ్ రవిచంద్రన్ సంగీతం అందించగా, సన్ పిక్చర్స్ బ్యానర్ పై కళానిధి మారన్ ఈ చిత్రాన్ని నిర్మించారు. భారీ అంచనాల నడుమ ఈ సినిమా గత బుధవారం రిలీజయ్యింది. మొదటి షో నుండే మిక్స్డ్ టాక్ తెచ్చుకున్న ఈ మూవీ పట్ల విజయ్ అభిమానులు కూడా నిరాశ చెందారు. కేజీఎఫ్ 2 చిత్రానికి పోటీగా విడుదలైన బీస్ట్ ఆ చిత్రానికి ఏ మాత్రం పోటీనివ్వలేకపోయింది. విజయ్ క్రేజ్, ఫ్యాన్ బేస్ వల్లనే తమిళనాడులో ఫర్వాలేదనిపించుకునే వసూళ్లయినా వస్తున్నాయి.
తాజాగా బీస్ట్ మూవీ పై విజయ్ తండ్రి చంద్రశేఖర్ తన స్పందనను తెలియజేసారు. ఆయన కూడా ఒక రచయిత, దర్శకుడు కావటంతో బీస్ట్ సినిమాలోని ప్రతీ లోపాన్ని ఎత్తిచూపించారు. ముఖ్యంగా బీస్ట్ దర్శకుడు నెల్సన్ పై చంద్రశేఖర్ నిప్పులు చెరిగారు. అప్ కమింగ్ డైరెక్టర్స్ మొదటి రెండు సినిమాలు బాగానే చేస్తారు. మూడో సినిమాగా స్టార్ హీరో అవకాశం ఇచ్చినప్పుడు, మేఘాల్లో తేలుతూ స్క్రిప్ట్ పై కనీస హోమ్ వర్క్ కూడా చేయకుండా సెట్స్ కి వచ్చేస్తారు. బీస్ట్ విషయం లో కూడా అదే జరిగింది. టెర్రరిజం, హైజాక్ వంటి యూనివర్సల్ కాన్సెప్ట్స్ ని ఎంచుకున్నప్పుడు కథపై తీవ్ర కసరత్తులు చేయాల్సిన అవసరం వుంది. ఇలాంటి సినిమాల్లో పవర్ఫుల్ స్క్రీన్ ప్లే ఉంటే, ఆ సినిమా నెక్స్ట్ లెవెల్ లో ఉంటుంది. కానీ బీస్ట్ లో అలాంటి స్క్రీన్ ప్లే నే లేదు. విజయ్ స్టార్డం, సంగీతం, ఫైట్స్, ఎడిటింగ్ విభాగాల్లో మాత్రమే ఈ సినిమా హిట్ అయ్యింది తప్పితే దర్శకుడి ప్రతిభ ఎక్కడా కనిపించలేదు... అంటూ చంద్రశేఖర్ నెల్సన్ ను తీవ్రంగా విమర్శించారు.
|
|