పవన్ అప్ కమింగ్ ప్రాజెక్ట్ లో 'రమికాసేన్'... ?

ప్రశాంత్ నీల్ డైరెక్షన్లో రాకింగ్ స్టార్ యష్ హీరోగా నటించిన చిత్రం కేజీఎఫ్. 2018లో విడుదలైన ఈ చిత్రం సంచలన విజయాన్ని నమోదుచేసిన విషయం తెలిసిందే. అయితే ఈ చిత్రానికి కొనసాగింపుగా ఈ మధ్యనే కేజీఎఫ్ 2 విడుదలై ఘనవిజయం సాధించింది. ఇందులో బాలీవుడ్ నటులు సంజయ్ దత్, రవీనా టాండన్ కీలక పాత్రలు పోషించారు. ముఖ్యంగా ఈ సినిమాలో ప్రధాన మంత్రి పాత్రలో, రవీనా తన పవర్ఫుల్ యాక్టింగ్ తో ప్రేక్షకుల చేత విజిల్స్ కొట్టించుకుంది. కేజీఎఫ్ 2లో రాఖీభాయ్ తర్వాత అంతగా పేరు వచ్చింది రమికా అంటే రవీనా కే. రాఖీభాయ్, రమికా కాంబో సీన్స్ మూవీ కే హైలైట్ గా నిలిచాయనటంలో ఎలాంటి సందేహం లేదు. అంతలా రమికా పాత్రలో లీనమైపోయింది రవీనా. ఈ సినిమా తెచ్చిన గుర్తింపు తో రవీనా మరో క్రేజీ ఆఫర్ కొట్టేసింది. అదేంటంటే... పవర్ స్టార్ పవన్ కళ్యాణ్ ప్రస్తుతం హరిహరవీరమల్లు మూవీ షూటింగ్ లో బిజీగా ఉన్నారని తెలుసు కదా. ఈ సినిమా అయిపోయిన వెంటనే డాషింగ్ డైరెక్టర్ హరీష్ శంకర్ తో మరో ప్రెస్టీజియస్ మూవీలో పవన్ నటించనున్నారు. అదే భవదీయుడు భగత్ సింగ్. ఔటండౌట్ యాక్షన్ ఎంటర్టైనర్ గా తెరకెక్కుతున్న ఈ మూవీలోని ఒక కీలక పాత్ర కోసం దర్శకుడు హరీష్ శంకర్ బాలీవుడ్ నటి రవీనా టాండన్ ను సంప్రదించినట్టు తెలుస్తోంది. హరీష్ చెప్పిన స్టోరీ, అందులో తన పాత్ర రవీనాకు బాగా నచ్చటంతో వెంటనే ఆ సినిమాకు ఓకే చెప్పేసిందని టాక్. ఇదే గనక నిజమైతే, అప్పుడెప్పుడో మంచు వారి పాండవులు పాండవులు తుమ్మెద లో మెరిసిన రవీనా ఆ సినిమా తర్వాత మళ్ళీ పవన్ సినిమాలోనే కనిపించనుంది. అయితే ఈ సినిమాలో రవీనా పాత్రకు మంచి స్కోప్ ఉండే ఛాన్సుంది. చూద్దాం... ఈ వార్తలో ఎంతవరకు నిజముందో... ఇది తెలియాలంటే కొంచెం టైం పడుతుంది.