'సర్కారువారిపాట' ట్రైలర్ రిలీజ్... ఔటండౌట్ మాస్ యాక్షన్ తో సూపర్స్టార్ మెరుపులు...
cinema | Suryaa Desk | Published : Mon, May 02, 2022, 09:40 PM
టాలీవుడ్ సూపర్ స్టార్ మహేష్ బాబు కొత్త చిత్రం సర్కారువారిపాట. గీతగోవిందం ఫేమ్ పరశురామ్ డైరెక్షన్లో కీర్తి సురేష్ కథానాయికగా నటిస్తున్న ఈ చిత్రాన్ని మైత్రీ మూవీ మేకర్స్, 14రీల్స్ ప్లస్, GMB ఎంటర్టైన్మెంట్స్ సంస్థలు సంయుక్తంగా నిర్మించాయి. థమన్ స్వరాలను సమకూర్చారు. ఈ మూవీ నుండి విడుదలైన కళావతి, పెన్నీ, టైటిల్ పాటలు ప్రేక్షకుల ను విపరీతంగా ఆకట్టుకుంటున్నాయి. ఆడియోతో ఈ మూవీ పై సగం అంచనాలు పెరిగితే తాజాగా విడుదలైన ట్రైలర్ తో ఆ అంచనాలు రెట్టింపయ్యాయి. ట్రైలర్ ఆద్యంతం హై ఓల్టేజ్ తో కొనసాగింది. మధ్య మధ్యలో కీర్తి సురేష్ తో లవ్ సీన్స్ చాలా బావున్నాయి. ఒక పక్క మాస్ యాక్షన్ చేస్తూనే మహేష్ చాలా హ్యాండ్సమ్ గా కనిపిస్తున్నాడు. మహేష్ తన డిక్షన్ తో మరోసారి ప్రేక్షకులను ఆకట్టుకుంటాడని చెప్పవచ్చు. నా ప్రేమను దొంగిలించగలవు... నా స్నేహాన్ని కూడా దొంగిలించగలవు... యు కాంట్ స్టీల్ మై మనీ అనే డైలాగ్ తో మహేష్ ట్రైలర్ ను ఓపెన్ చేస్తాడు. మొత్తంగా డబ్బు ప్రధానంగా సినిమా నడుస్తుందని అర్ధమవుతుంది. ఇక సూపర్స్టార్ మాస్ అవతారాన్ని, థియేటర్లో ఆయన చేసే ఊర మాస్ జాతారని చూడాలంటే మే 12వరకు ఆగాల్సిందే.
|
|