వల్లమాలిన అభిమానం అంటే ఇదేనేమో.... పెళ్లి పత్రికలో జనసైనికుడి వింత ప్రచారం
cinema | Suryaa Desk | Published : Tue, May 03, 2022, 12:37 PM
సెలెబ్రిటీలలోకెల్లా సినీ సెలెబ్రిటీలు వేరయా అన్నట్టు సినిమాల్లో నటించే నటీనటుల మీద ప్రేక్షకుల అభిమానం ఎలా ఉంటుందో మాటల్లో చెప్పలేం. అందునా పవన్ కళ్యాణ్ లాంటి సినీ రాజకీయ దిగ్గజానికి వీరాభిమానులు, ఆయన అడిగితే ప్రాణాన్నైనా తృణప్రాయంగా వదులుకునే అభిమానులు అనేకమంది. మాములుగా మనకు నచ్చిన హీరోల కోసం మనమేం చేస్తాం? మహా అయితే ఆయన మూవీ ఫస్ట్ డే ఫస్ట్ షో చూస్తాం. లేకపోతే ఆ హీరో ఎక్కడికైనా వస్తున్నాడన్న, లేక ఏ ఈవెంట్లో అయినా పాల్గొంటున్నాడని తెలిసినా వెంటనే మనం కూడా అక్కడ వాలిపోతాం. వీటన్నిటితో పాటు పలు సేవా కార్యక్రమాలను కూడా చేస్తూ అభిమానులందరిలోకెల్లా మేము భిన్నం అంటుంటారు పవన్ అభిమానులు. ఆయన పిలుపుకే లక్షలమంది హాజరవుతుంటారు. మరి అలాంటి నాయకుడి ఆదర్శభావాలు పది మందికి తెలియటానికి, అలాంటి నాయకుడు రాజకీయాల్లో ఎదగటానికి ఆయన అభిమాని ఒకతను వింత ప్రచారానికి పూనుకున్నారు. తూర్పు గోదావరి జిల్లా కొవ్వూరుకు చెందిన హరీష్ బాబు ఆ జిల్లా జనసేన లీగల్ సెల్ కార్యదర్శిగా పనిచేస్తున్నారు. తాజాగా వైవాహిక జీవితంలోకి అడుగు పెట్టబోతున్న హరీష్ తన వివాహ ఆహ్వాన పత్రిక పై భాగంలో జనసేన మ్యానిఫెస్టో ను, ఆ పార్టీ సింబల్ ను, పవన్ ఫోటోలను ముద్రించాడు. వివాహ పత్రిక కింది భాగంలో తన పెళ్ళికి సంబంధించిన వివరాలను పొందుపరిచాడు. పవన్ మీద ఉన్న అపార అభిమానమే ఈ పని చెయ్యటానికి తనను ప్రేరేపించిందని హరీష్ తెలిపాడు. పవన్ అభిమానులను విపరీతంగా ఆకట్టుకుంటున్న ఈ వివాహ పత్రిక ప్రస్తుతం సోషల్ మీడియాలో వైరల్ గా మారింది.
|
|