కీర్తి ఆశలన్నీ ఆ సినిమాపైనే
cinema | Suryaa Desk | Published : Sun, May 08, 2022, 05:42 PM
కీర్తి సురేశ్ తెలుగు సినిమా అభిమానులకు బాగా తెలిసిన పేరు. కానీ కేరీర్ పరంగా ఒక్కో మెట్టు ఎదిగిన ఇటీవల కొన్ని ఇబ్బందులను ఎదుర్కొంటున్నారు. తెలుగు తెరకి కీర్తి సురేశ్ 'నేను శైలజ' సినిమాతో పరిచయమైంది. తొలి ప్రయత్నంలోనే భారీ విజయాన్ని సొంతం చేసుకుంది. ఆ తరువాత చేసిన 'నేను లోకల్' సినిమా కూడా సూపర్ హిట్ అయింది. ఆడిపాడే పాత్రలతో ఈ అమ్మాయి ఓ అరడజను సినిమాలు చేస్తుందేమోనని అంతా అనుకున్నారు. అలా అనుకున్న వాళ్లంతా ఆశ్చర్యపోయేలా 'మహానటి'లో ఆమె విశ్వరూపం చూపించింది.
ఇక తెలుగులో కీర్తి సురేశ్ ను పట్టుకోవడం కష్టమేనని అంతా అనుకున్నారు. అయితే ఆమె తెలుగులో చాలా గ్యాప్ ఇచ్చేసి తమిళంలో వరుస సినిమాలను చేసుకుంటూ వెళ్లింది. ఆ తరువాత తెలుగులో ఆమె ఒప్పుకున్న సినిమాలు నాయిక ప్రధానమైనవే. ఈ సమయంలోనే ఆమె బాగా సన్నబడింది. దాంతో లుక్ పరంగా కూడా ఆమె 'మిస్ ఇండియా' .. ' గుడ్ లక్ సఖి' వంటి సినిమాల్లో అలరించలేకపోయింది.
ఇలా కీర్తి సురేశ్ ఒకదాని తరువాత ఒకటిగా పొరపాట్లు చేస్తూ వచ్చింది. తెలుగు ఆడియన్స్ కోరుకుంటున్న విధంగా తెరపై కీర్తి సురేశ్ కనిపించి .. ఆమె హిట్ అందుకుని చాలకాలమే అయింది. ఈ నేపథ్యంలో ఈ నెల 12వ తేదీన విడుదలవుతున్న 'సర్కారువారి పాట' పైనే ఆమె గట్టి ఆశలు పెట్టుకుంది. ఈ సినిమాతో కీర్తి సురేశ్ ఆశించే హిట్ పడుతుందేమో చూడాలి.
|
|