అందుకే గ్యాప్ వచ్చింది: పరుచూరి గోపాలకృష్ణ
cinema | Suryaa Desk | Published : Thu, May 12, 2022, 01:23 PM
పరుచూరి బ్రదర్స్ ఈ మధ్య వార్తల్లో ఎక్కువగా నిలుస్తున్నారు. పరుచూరి వెంకటేశ్వర్రావు ఫోటో ఒకటి నెట్టింట్లో చక్కర్లు కొట్టడం, ఆయన అనారోగ్యం గురించి రకరకాల వార్తలు రావడం అందరికీ తెలిసిందే. జయంత్ సీ పరాన్జీ షేర్ చేసిన ఆ ఫోటోలతో పరుచూరి ఆరోగ్యం మీద లేనిపోని అనుమానాలు వచ్చాయి. అయితే వాటి మీద పరుచూరి గోపాలకృష్ణ స్పందించారు. అసలు విషయాన్ని చెప్పేశారు. అన్నయ్యకు ఆరోగ్యం బాగానే ఉందని, ఏమీ కాలేదని, ఎవ్వరూ ఆందోళన చెందవద్దని పరుచూరి గోపాలకృష్ణ కోరారు.
అయితే గత కొన్ని రోజులుగా పరుచూరి యూట్యూబ్లో కనిపించలేదు. పరుచూరి పలుకులు అంటూ పాఠాలు చెప్పలేదు. దీంతో కొత్త అనుమానాలు పుట్టుకొచ్చాయి. ఆయనకు ఏమైంది? ఏం జరిగి ఉంటుంది? ఎందుకు కనిపించడం లేదని అంతా అనుకున్నారు. వాటన్నంటికి కొత్త వీడియోతో సమాధానాలు ఇచ్చారు. ఆచార్య సినిమా గురించి చెబుతూ తన కంటికి జరిగిన ఆపరేషన్ గురించి కూడా సీక్రెట్ రివీల్ చేసేశారు. గత కొన్ని రోజులుగా మీ ముందుకు రాలేకపోయాను.. దానికి కారణం కంటికి జరిగిన ఆపరేషన్. ఇప్పుడు కూడా పరిస్థితి అలానే ఉంది.. ఈ లైట్లు ఇంకా కళ్ల మీద పడకూడదని డాక్టర్ సలహాలు ఇచ్చారు.. టీవీలు, సినిమాలు కూడా చూడొద్దని అన్నారు.. అందుకే మధ్యలో కొన్ని రోజులు గ్యాప్ ఇచ్చాను అని పరుచూరి గోపాలకృష్ణ చెప్పుకొచ్చారు. మొత్తానికి ఇంకొన్ని రోజులు మాత్రం విశ్రాంతి తీసుకోవాలని, అంత వరకు ఈ కళ్లద్దాలు వాడమని వైద్యులు సూచించినట్టు తెలుస్తోంది.
|
|