సరికొత్త తరహాలో 'అంటే సుందరానికి' మూవీ ప్రమోషన్స్

ఈ మధ్య కాలంలో సినిమా తీశామా... థియేటర్లలో విడుదల చేశామా ... అన్న తీరుగా ఉంటే, ఆ సినిమా కంటెంట్ ఎంత బలంగా ఉన్నా, బాక్సాఫీస్ వద్ద పరాజయం తప్పదు. ఒకవేళ సినిమాకు పాజిటివ్ టాక్ వచ్చినా, సరైన ప్రమోషన్స్ లేక కలెక్షన్స్ రావు. సినిమాను ప్రాణం పెట్టి రూపొందించిన చిత్రబృందం, తమ సినిమాను జనాల్లోకి తీసుకెళ్లాలి. వీలైనంత పబ్లిసిటీని కల్పించాలి. అప్పుడే థియేటర్లకు జనాల రాక మెండుగా ఉంటుంది.., తద్వారా కలెక్షన్లు కూడా సాలిడ్ గా ఉంటాయి. దీంతో మన దర్శకనిర్మాతలు ప్రమోషన్స్ ను కూడా భారీగానే చేస్తున్నారు. రీసెంట్గా ఈ ప్రమోషన్ల పర్వం కొత్తపుంతలు తొక్కుతుంది. ఇంటర్వ్యూలు, ప్రెస్ మీట్లు లాంటివే కాకుండా చిట్ చాట్ సెషన్లు, సోషల్ మీడియా మీటింగులు చేస్తూ తమ సినిమాకు ప్రేక్షకుల్లో కావాల్సినంత బజ్ ను తీసుకొస్తున్నారు. ఆ మధ్య ఆర్ ఆర్ ఆర్ మూవీ ప్రమోషన్స్ కూడా చాలా వెరైటీగా జరిగాయి. అయితే, అది ఇక్కడ కాదు.., బాలీవుడ్లో.. ఆ తర్వాత మహేష్ బాబు నటించిన సర్కారువారిపాట మూవీ ప్రమోషన్స్ కోసం ఎప్పుడూ లేనిది ఏకంగా సూపర్ స్టార్ రంగంలోకి దిగారు. ఇంటర్వ్యూలు, చిట్ చాట్ లు, సోషల్ మీడియా ప్రశ్నోత్తరాలతో మహేష్ అదరగొట్టేసారు. 

నాని నటించిన అంటే సుందరానికి మూవీ కూడా మొదటినుండి డిఫరెంట్ గా ప్రమోషన్స్ చేస్తూ వస్తోంది. షూటింగ్ పూర్తైనప్పటి నుండి మూవీ అప్డేట్ లను వరస పెట్టి ఇస్తూ ప్రేక్షకుల్లో పాజిటివ్ వైబ్స్ ను క్రియేట్ చేసింది. ఇటీవలే దిస్ ఆర్ దట్ అనే ప్రచార కార్యక్రమంలో పాల్గొన్న నాని, నజ్రియాలు తాజాగా క్వశ్చన్ అండ్ ఆన్సర్ విత్ లీలా సుందర్ అనే ప్రోగ్రాం ను చేసారు. ఒకరి అలవాట్లు, అభిరుచులు మరొకరికి ఎంత వరకు తెలుసు? అనే నేపథ్యంలో ఈ ప్రోగ్రాం చేసారు. నాని, నజ్రియా అభిమానులు ఈ వీడియోను చూసి తెగ మురిసిపోతున్నారు. తమ అభిమాన నటీనటుల ఇష్టాలను తెలుసుకుని తాము కూడా అలవాటు చేసుకునేందుకు సిద్దపడుతున్నారు.