"మేజర్ తో నువ్వు కూడా పాన్ ఇండియా నటుడివైపోయావా?..." శేష్ దిమ్మతిరిగే ఆన్సర్

చిత్రసీమలో, మీడియాలో "పాన్ ఇండియా" అనే పదం ఈ మధ్య ఎక్కువగా వినబడుతుంది. నాలుగైదు భాషల్లో విడుదలయ్యే సౌత్ సినిమాను పాన్ ఇండియా సినిమా అంటున్నారు. పాన్ ఇండియా అనే పదంపై, పాన్ ఇండియా సినిమాలపై ఒక్కొక్కరూ ఒక్కోలా స్పందిస్తున్నారు. సిద్దార్థ్ వంటి నటులైతే, పాన్ ఇండియా అనే పదం వింటేనే నవ్వొస్తుందని వివాదాస్పద కామెంట్లు కూడా చేసారు. పాన్ ఇండియా అనే కన్నా ఇండియన్ సినిమా అంటే బావుంటుందని చాలా మంది అభిప్రాయం. 

అడవి శేష్ హీరోగా, శశికిరణ్ తిక్కా డైరెక్షన్లో రూపొందిన పాన్ ఇండియా చిత్రం మేజర్. 2008 ముంబై దాడుల్లో, తన ప్రాణాలను సైతం పణంగా పెట్టి ఎంతో మంది అమాయక ప్రజల ప్రాణాలను కాపాడిన మేజర్ సందీప్ ఉన్నికృష్ణన్ బయోపిక్ గా ఈ మూవీ తెరకెక్కింది. జూన్ 3న పాన్ ఇండియా భాషల్లో విడుదలవుతున్న మేజర్ మూవీ ప్రస్తుతం ఆయా మెట్రో నగరాల్లో ప్రీమియర్ షోలను ప్రదర్శిస్తుంది. ప్రీమియర్ ను చూసిన ప్రతి ఒక్కరూ సినిమాపై ప్రశంసల వర్షం కురిపిస్తున్నారు. ఈ మూవీ ప్రమోషన్స్ ను శేష్ చాలా జాగ్రత్తగా చేసుకుంటూ వస్తున్నారు. ఈ మేరకు వీలైనన్ని ఎక్కువ ఇంటర్వ్యూలలో పాల్గొంటున్న శేష్ సోషల్ మీడియాలో చిట్ చాట్ సెషన్ లను కూడా నిర్వహిస్తూ, మేజర్ చిత్రాన్ని జనాల్లోకి తీసుకెళ్తున్నాడు. ఈ క్రమంలో ఒక నెటిజన్ చేసిన ట్వీట్ కి, శేష్ ఇచ్చిన సమాధానం సోషల్ మీడియాలో వైరల్ అవుతుంది. 

ప్రస్తుతం భారత దేశ  చిత్ర పరిశ్రమలో పాన్ ఇండియా ట్రెండ్ సాగుతుండటంతో, ఒక నెటిజన్ అడవి శేష్ ను "ఇప్పుడు నువ్వు కూడా పాన్ ఇండియా స్టార్ అయిపోయావా?" అన్న ప్రశ్నకు శేష్ ఎంతో తెలివిగా స్పందించి, నెటిజన్లు, ప్రేక్షకుల మెప్పును పొందాడు. నాకు తెలిసి మేజర్ సందీప్ ఉన్నికృష్ణన్ ప్రతి భారతీయుడికి హీరోనే... అని శేష్ ఇచ్చిన సమాధానం ఎంతోమంది నోళ్లను మూయించింది.