ఒంటిచేత్తో విక్రమ్ ప్రమోషన్స్ చేస్తున్న కమల్ హాసన్ .. విజయ్, ఫాహద్ ఎందుకు రావట్లేదు?

విశ్వనటుడు కమల్ హాసన్ నటించిన హై ఇంటెన్స్ యాక్షన్ ఎంటర్టైనర్ విక్రమ్. ఈ చిత్రాన్ని లోకేష్ కనగరాజ్ డైరెక్ట్ చేసారు. అనిరుద్ రవిచంద్రన్ సంగీతం అందించారు. వెర్సటైల్ యాక్టర్స్ విజయ్ సేతుపతి, ఫాహద్ ఫాజిల్ కీ రోల్స్ ప్లే చేసారు. ఈ సినిమాలో హీరో సూర్య అతిధి పాత్రలో నటిస్తున్నారు. తమిళ, తెలుగు, హిందీ భాషలలో ప్రపంచవ్యాప్తంగా జూన్ 3న థియేటర్లలో విడుదల కాబోతుంది. రీసెంట్ గా రిలీజైన ట్రైలర్ తో ఈ సినిమాపై ప్రేక్షకుల్లో పాజిటివ్ బజ్ క్రియేట్ అయ్యింది. గత కొద్దిరోజుల నుండి కమల్ హాసన్ మూవీ ప్రచార కార్యక్రమాలు చేస్తూ చాలా బిజీగా గడిపారు. దేశవ్యాప్తంగా పర్యటనలు చేస్తూ, ఆయా ప్రాంతాల్లో ప్రెస్ మీట్లు, ఇంటర్వ్యూలు ఇస్తూ కమల్ ఒంటిచేత్తో విక్రమ్ ప్రచార కార్యక్రమాలను నిర్వర్తిస్తున్నారు. డైరెక్టర్ లోకేష్ కనగరాజ్, మ్యూజిక్ డైరెక్టర్ అనిరుద్ రవిచంద్రన్ కొన్ని కార్యక్రమాల్లో కమల్ కు తోడుగా ప్రచారం చేసారు. హైదరాబాద్ లో జరిగిన ప్రీ రిలీజ్ ఈవెంట్ కు కమల్, అనిరుద్, లోకేష్ మాత్రమే హాజరయ్యారు. సినిమాలో కీలక పాత్రలు పోషించిన విజయ్ సేతుపతి, ఫాహద్ ఫాజిల్ లు ఇప్పటివరకు జరిగిన విక్రమ్ ప్రమోషన్స్ లో ఎక్కడా కనబడలేదు. ఒకసారనుకుంటా, తమిళ్ ఆడియో ఫంక్షన్ లో విజయ్ సేతుపతి అలా.. మెరిశాడు. అంతే. ఫాహద్ ఫాజిల్ ఐతే ఒక్కసారి కూడా విక్రమ్ ను ప్రమోట్ చేయలేదు. 

అందుతున్న సమాచారం మేరకు, విజయ్ సేతుపతి ప్రస్తుతం ముంబైలో ఉన్నారు. కత్రినా కైఫ్ తో నటిస్తున్న మెర్రీ క్రిస్మస్ మూవీ షూటింగ్ లో విజయ్ బిజీగా ఉన్నాడు. మరి ఫాహద్ ఎందుకు విక్రమ్ ను ప్రమోట్ చెయ్యట్లేదు తెలియాల్సి ఉంది.