రోల్ రైడా ‘అరుపు’.. ఈ సాంగ్ యూట్యూబ్‌లో దూసుకుపోతోంది

‘బిగ్ బాస్’ తెలుగు సీజన్ 2 కంటెస్టెంట్ రోల్ రైడా, మనీషా యేరాబత్తిని పవర్‌ఫుల్ ర్యాప్ సాంగ్ ‘అరుపు’ ఇటీవల విడుదలైంది. కమ్రన్ కంపోజ్ చేసిన ఈ పాట వీడియోకు హరికాంత్ గునమగరి దర్శకత్వం వహించారు. ప్రస్తుతం ఈ సాంగ్ యూట్యూబ్‌లో దూసుకుపోతోంది. విడుదలైన నాలుగు రోజుల్లో 8.5 లక్షలకు పైగా వ్యూస్ సాధించింది. సమాజంలో మహిళలపై పెరుగుతున్న అకృత్యాలపై ఈ ర్యాప్ వీడియోను రూపొందించారు. ఈ వీడియోలో రోల్ రైడా స్వయంగా నటించారు. 

‘పుట్టగానే ఏడ్చినప్పుడు తెలియలేదు.. చచ్చే వరకు ఏడుస్తూనే ఉంటానని’ అంటూ రోల్ రైడా గొంతుతో వీడియో ప్రారంభమవుతుంది. ఆ వెంటనే ‘లోకం మొత్తం నాదే అసలు.. నా లోపలే జీవం మొదలు.. అయ్యా నేడే మీకే అలుసు.. నా కోపమే మీకేం తెలుసు.. పేగు పేగు నాతో కలిసి నా నెత్తురే మీకే పంచి.. పెంచా పెంచా నాపై దుమికే ఈ రాక్షసుల్లా’ అంటూ వచ్చే మనీషా వోకల్ అద్భుతంగా ఉంది. మనీషా ఆలపించిన ఈ లిరిక్స్‌ను కృష్ణకాంత్ రచించారు. ఇక రోల్ రైడా ఆలపించిన ర్యాప్ లిరిక్స్‌ను ఆయనే రాసుకున్నారు. బాలికలు, అమ్మాయిలపై జరుగుతున్న అత్యాచారాలు, పెళ్లైయిన తరవాత భర్త వేధింపులు, ఎన్నారై భర్తల అఘాయిత్యాలు ఇలా అన్నింటినీ రోల్ రైడా తన పాటలో ప్రస్తావించారు. 

ప్రస్తుతం రోల్ రైడా పాటకు విశేష స్పందన వస్తోంది. మహిళలపై జరుగుతున్న అఘాయిత్యాల గురించి ర్యాప్ సాంగ్‌లో ఇంత బాగా చెప్పడం పట్ల నెటిజన్లు ప్రశంసల వర్షం కురిపిస్తున్నారు. ఈ మేరకు యూట్యూబ్‌లో వీడియో కింద కామెంట్లు పెడుతున్నారు. ‘బిగ్ బాస్’లో రోల్ రైడాను చూసి ఇప్పటి వరకూ ట్రోల్ చేశామని, కానీ ఇప్పుడు ఆయనపై గౌరవం పెరిగిందంటూ కొంత మంది కామెంట్లు పెడుతున్నారు. రిలిక్స్ అద్భుతంగా ఉన్నాయని, ప్రస్తుతం సమాజంలో జరుగుతున్నవన్నీ ప్రస్తావించారని కొనియాడుతున్నారు. మొత్తం మీద ఓ సోషల్ మెసేజ్‌తో రోల్ రైడా అందరి మనసులు గెలుచుకున్నారు. కాగా, ఈ వీడియోను కాలా మీడియా వర్క్స్ పతాకంపై సునీల్ గడ్డమేది, శ్రీని శ్రీగధ నిర్మించారు.