టాలీవుడ్‌ పై జాన్వికపూర్‌ దృష్టి

దివంగత శ్రీదేవి గారాలపట్టిగా చెప్పుకున్న జాన్వికపూర్‌ ఇప్పుడు టాలీవుడ్‌లో అడుగుపెట్టనున్నట్లు విశ్వసనీయ సమాచారం. గతంలో తన కుమార్తెను మంచి ప్రాజెక్టు కుదిరితే తెలుగులోనే పరిచయం చేయాలని శ్రీదేవి భావించిందట. అయితే అందుకు తగ్గ అవకాశాలు కుదరకపోవడంతో జాన్విని ఆమె హిందీలోనే పరిచయం చేసే నిర్ణయం తీసుకున్నారు.అందులో భాగంగా జాన్వి నటించిన తొలిచిత్రం దఢక్‌ బాలీవుడ్‌లో బాక్సాఫీసు వద్ద భారీ కలెక్షన్లను రాబట్టింది. ఈ చిత్రం విజయవంతమవుతుందని చిత్రబృందం ఆశించినప్పటికీ ఇంత భారీ విజయం సాధిస్తుందని వారు కూడా ఊహించలేదు. దీంతో జాన్విలో ఉత్సాహం రెట్టింపయ్యింది. వెంటనే హిందీలోనే రెండో చిత్రం చేస్తున్నారు.

మరోవైపు టాలీవుడ్‌ దృష్టి జాన్విపై పడింది. ఎన్టీఆర్‌, రామ్‌చరణ్‌ కథానాయకులుగా ఎస్‌.ఎస్‌.రాజమౌళి దర్శకత్వంలో తెరకెక్కుతున్న భారీ చిత్రంలో ఇంకా హీరోయిన్లు ఎవరన్నది అధికారికంగా వెలువడలేదు. కీర్తి సురేష్‌తో పాటు జాన్వి పేరు కూడా వినిపిస్తోంది. ఈ కాంబినేషన్‌ చిత్రంలో నటిస్తే…టాలీవుడ్‌లో మంచి ఎంట్రీ అవుతుందని జాన్వి తండ్రి బోనీకపూర్‌ భావిస్తున్నారట. ఇటీవలనే రెగ్యులర్‌ షూటింగ్‌ను ప్రారంభించుకున్న ఈ చిత్రంలోని కథానాయికలను అధికారికంగా ఎప్పుడు ప్రకటిస్తారో అన్న ఆసక్తి సర్వత్రా నెలకొంది. శ్రీదేవిని ఎంతగానో అభిమానించిన తెnలుగు ప్రేక్షకులు ఆమె కుమార్తెను కూడా తెలుగు సినిమాలలో చూడాలని కోరుకుంటున్నారు. బాలీవుడ్‌తో పాటు టాలీవుడ్‌లో కూడా వరుస సినిమాలను చేసేందుకు జాన్వి ఎలాంటి నిర్ణయం తీసుకుంటారో వేచిచూడాల్సిందే. ఏదిఏమైనప్పటికీ జాన్వి టాలీవుడ్‌ ఎంట్రీ గురించి చర్చోపచర్చ జరుగుతోంది.