మహేష్ బాబు ప్రయోగాలు చేసే పరిస్థితుల్లో లేడు
cinema | Suryaa Desk | Published : Thu, Jan 10, 2019, 01:06 PM
సూపర్ స్టార్ మహేష్ బాబు ప్రస్తుతం వంశీ పైడిపల్లి దర్శకత్వంలో 'మహర్షి' సినిమాలో నటిస్తున్నాడు. ఈ సినిమా ఉగాదికి ప్రేక్షకుల ముందుకు రానుంది. ఈ సినిమా విడుదలకు ముందే మహేష్ తన నెక్స్ట్ సినిమాకు గ్రీన్ సిగ్నల్ ఇచ్చిన సంగతి తెలిసిందే. సుకుమార్ చాలా రోజుల నుండి స్క్రిప్ట్ పై వర్క్ చేస్తున్నాడు గానీ ఇంకా ఫైనల్ డ్రాఫ్ట్ రెడీ కాలేదు.
గతంలో మహేష్ బాబు బౌండ్ స్క్రిప్ట్ లేకున్నా సినిమా చేయడానికి ముందుకువచ్చేవాడుగానీ ఇప్పుడు ఆ విషయంలో ఏమాత్రం రిస్క్ తీసుకునేందుకు సిద్దంగా లేడట. బౌండ్ స్క్రిప్ట్ తో మహేష్ ను మెప్పిస్తే గానీ సుకుమార్ సినిమా పట్టాలెక్కే అవకాశం లేదని అంటున్నారు. చరణ్.. ఎన్టీఆర్ లు ఇద్దరు #RRR తో బిజీగా ఉండడంతో ఆ సినిమా రిలీజ్ అయ్యే లోపు మహేష్ రెండు సినిమాలు చేసేందుకు రెడీగా ఉన్నాడు. సుకుమార్ సినిమా కాకుండా మరో యువ దర్శకుడితో సినిమా చేసేందుకు ప్లాన్ చేస్తున్నాడట. అందుకోసం ఇప్పటికే కథలు వింటున్నాడట.
ఎవరితో సినిమా అయినా.. మహేష్ ను కంటెంట్ తో మెప్పించి.. బౌండ్ స్క్రిప్ట్ రెడీ చేస్తేనే మహేష్ వారికి గ్రీన్ సిగ్నల్ ఇస్తాడట. 'బ్రహ్మోత్సవం'.. 'స్పైడర్' లాంటి గత అనుభవాలు మహేష్ కు గట్టిగా పాఠాలు నేర్పించినట్టుగా ఉన్నాయి. ఏదేమైనా ఇలాంటి విషయాలలో ముందే జాగ్రత్తపడడం మంచిదే. అభిమానులకు కూడా ఇది ఊరటనిచ్చే అంశమే.
|
|