వెంకటేష్ తన తర్వాతి సినిమా తన అల్లుడితోనే

కొన్ని సంవత్సరాల ముందు వరకు వెంకీ సంవత్సరంకు రెండు మూడు సినిమాలు కూడా చేశాడు. కాని ఈమద్య కాలంలో సంవత్సరంలో కనీసం ఒక్కటి కూడా విడుదల చేయడం లేదు. ఆచి తూచి సినిమాలను ఎంపిక చేసుకుంటున్న వెంకటేష్ సంక్రాంతి కానుకగా ‘ఎఫ్ 2’ చిత్రాన్ని ప్రేక్షకుల ముందుకు తీసుకు రాబోతున్నాడు. అనీల్ రావిపూడి దర్శకత్వంలో వరుణ్ తేజ్ తో కలిసి వెంకటేష్ ఈ చిత్రంలో నటించాడు. ఈ చిత్రం సమయంలోనే నాగచైతన్యతో ఒక సినిమాను వెంకీ చేయబోతున్నట్లుగా వార్తలు వచ్చాయి. కాని ఆ సినిమా ఎక్కడ వేసిన గొంగడి అక్కడే అన్నట్లుగా ఉండి పోయింది.

ఇక వెంకటేష్ హీరోగా త్రివిక్రమ్ మూవీ అంటూ చాలా ఏళ్లుగా మీడియాలో నానుతూ వస్తోంది. త్రివిక్రమ్ మూవీ వెంకీతో ఉంటుందా లేదా అనే అనుమానాలు వ్యక్తం అవుతున్నాయి. ప్రస్తుతం యంగ్ స్టార్ హీరోలతోనే త్రివిక్రమ్ వరుసగా చిత్రాలు చేస్తున్నాడు. త్రివిక్రమ్ తో మూవీ చేయక పోవచ్చేమో అంటూ కొందరు అనుమానాలు వ్యక్తం చేస్తున్నారు. ఇలాంటి సమయంలో వెంకటేష్ రెండు సినిమాలపై క్లారిటీ ఇచ్చాడు.

‘ఎఫ్ 2’ విడుదల సందర్బంగా మీడియాకు ఇచ్చిన ఇంటర్వ్యూలో వెంకటేష్ మాట్లాడుతూ.. తన తదుపరి చిత్రం నాగచైతన్యతోనే ఉంటుందని పేర్కొన్నాడు. ఎమోషన్ సీన్స్ తో పాటు ఎంటర్ టైన్ మెంట్ ఆ చిత్రంలో ఉండబోతుందన్నారు. బాబీ దర్శకత్వంలో రూపొందబోతున్న వెంకీ మామ సినిమా తప్పకుండా అందరిని అలరించేలా ఉంటుందని చెప్పాడు. ఇక త్రివిక్రమ్ తో మూవీ తప్పకుండా ఉంటుందని త్వరలోనే త్రివిక్రమ్ మంచి కథతో వస్తాడని చూస్తున్నానంటూ వెంకటేష్ చెప్పుకొచ్చాడు. త్వరలోనే ఈ రెండు సినిమాలను కూడా ప్రేక్షకుల ముందుకు తీసుకు రావాలని తాను భావిస్తున్నట్లుగా వెంకటేష్ అన్నాడు.