ప్రియ ప్రకాష్ వారియర్ ను హౌస్ అరెస్ట్ చేశారట

కన్ను గీటే వీడియోతో గత ఏడాది మలయాళ పిల్ల ప్రియ వారియర్ ఎంత పాపులారిటీ సంపాదించిందో కొత్తగా చెప్పాల్సిన పని లేదు. ఆ వీడియోతో వచ్చిన పాపులారిటీని హ్యాండిల్ చేయడం చాలా కష్టమే అయిందని అంటోందామె. ఒక దశలో ప్రియ తల్లిదండ్రులు ఆమెను హౌస్ అరెస్ట్ చేయాల్సిన అవసరం వచ్చిందట.

తన కంటే కూడా తల్లిదండ్రులు ఆ సమయంలో ఎక్కువ కంగారు పడిపోయారని ప్రియ చెప్పింది. తన తొలి చిత్రం ‘ఒరు అడార్ లవ్’ తెలుగు వెర్షన్ ‘లవర్స్ డే’ ప్రమోషన్లలో భాగంగా హైదరాబాద్‌లో మీడియాను కలిసి ప్రియ.. తన ‘వింక్’ వీడియో తర్వాత ఎదురైన పరిస్థితుల గురించి మాట్లాడింది.

‘‘అప్పుడు నాకొచ్చిన పాపులారిటీ చూసి మా అమ్మా నాన్నా చాలా టెన్షన్ పడ్డారు. కొన్ని రోజులు నన్ను బయటికే పంపలేదు. హౌస్ అరెస్ట్ చేశారు. ఇంటర్వ్యూల కోసం వరుసగా పెద్ద ఎత్తున మీడియా ప్రతినిధులు ఇంటికి రాగా.. నేను ఇంట్లొ లేనని చెప్పేవారు. ఆ సమయంలో నాకు సినిమాలతో పాటు వాణిజ్య ప్రకటనల్లోనూ అవకాశాలు వచ్చాయి. ఐతే ‘ఒరు అడార్ లవ్’కు సంబంధించి అప్పటికి ఒక్క పాట మాత్రమే చిత్రీకరించాం. ఆ సమయంలో వేరే సినిమాలపై దృష్టి పెట్టడం మంచిది కాదనిపించింది. అందుకే అల్లు అర్జున్ సినిమాను సైతం కాదన్నా. ఇంకే సినిమా కూడా ఒప్పుకోలేదు. వాణిజ్య ప్రకటనలు చేయడానికి మాత్రం అభ్యంతరం లేకపోయింది. ‘ఒరు అడార్ లవ్’ పూర్తయ్యే దశలో హిందీ సినిమా ‘శ్రీదేవి బంగ్లా’ చేసే అవకాశం వచ్చింది. ఐతే ఈ సినిమా టీజర్ మీద అభ్యంతరాలు వ్యక్తమయ్యాయి. బోనీ కపూర్ నాకు లీగల్ నోటీసులు ఇచ్చినట్లు వాళ్లూ వీళ్లూ చెప్పారు కానీ.. నాకైతే నోటీసులు రాలేదు. ఈ సినిమాలో ఒక పాట మీద కూడా అభ్యంతరాలు వచ్చాయి. నాకు ఒకప్పుడు బ్రహ్మరథం పట్టిన సోషల్ మీడియానే తీవ్రంగా విమర్శించింది. మొదట్లో బాధపడ్డా.. ఇలాంటి వాటికి అలవాటు పడిపోయాను’’ అని ప్రియ చెప్పింది.