పెన్షన్ స్కీమ్ కంట్రిబ్యూషన్లలో తప్పులు.. ఉద్యోగులకు భారీ నష్టం

ఉద్యోగుల భవిష్య నిధి సంస్థ తన సభ్యులకు సంబంధించి ఒక ముఖ్యమైన అంశాన్ని గుర్తించింది. ఉద్యోగుల పెన్షన్ పథకం EPS-95 కింద జమ అవుతున్న విరాళాలలో కొన్ని తప్పులు దొర్లినట్లు ఈపీఎఫ్ఓ క్షేత్ర స్థాయి కార్యాలయాలను హెచ్చరించింది. ఈ తప్పుల వల్ల భవిష్యత్తులో పెన్షన్ పొందే సమయంలో ఇబ్బందులు తలెత్తే అవకాశం ఉందని పేర్కొంది. ఈపీఎస్ కంట్రిబ్యూషన్లలో పొరపాట్లను సవరించుకోవాలని ఉద్యోగులను హెచ్చరించింది. అందుకు ఏం చేయాలో వెల్లడించింది. మరి ఆ వివరాలు తెలుసుకుందాం.

ఈపీఎఫ్ఓ నిబంధనల ప్రకారం ఒక ఉద్యోగి జీతంలో యజమాని చెల్లించే 12 శాతం వాటాలో 8.33 శాతం పెన్షన్ ఫండ్‌కు వెళ్తుంది. అయితే, దీనికి ఒక గరిష్ఠ పరిమితి ఉంది. ప్రస్తుతం ఈ పరిమితి నెలకు రూ. 15,000గా ఉంది. అంటే, ఒక ఉద్యోగి జీతం ఎంత ఉన్నా, పెన్షన్ ఫండ్‌కు నెలకు గరిష్ఠంగా రూ.1,250 మాత్రమే జమ కావాలి. కానీ, చాలా సంస్థలు ఈ పరిమితిని పాటించకుండా, ఉద్యోగి పూర్తి వేతనంపై 8.33 శాతాన్ని లెక్కించి పెన్షన్ ఫండ్‌కు జమ చేస్తున్నట్లు ఈపీఎఫ్ఓ గుర్తించింది.

ఇలా పరిమితికి మించి జమ చేయాలంటే, పాత నిబంధనల ప్రకారం (Paragraph 11(3)) లేదా కొత్త నిబంధనల ప్రకారం ముందే అనుమతి తీసుకోవాల్సి ఉంటుంది. అలా అనుమతి లేకుండా ఎక్కువ మొత్తం జమ చేయడం నిబంధనలకు విరుద్ధం. సెప్టెంబర్ 1, 2014 తర్వాత చేరిన వారు, ఈ తేదీ తర్వాత ఉద్యోగంలో చేరి, రూ. 15,000 కంటే ఎక్కువ జీతం ఉండి కూడా పూర్తి జీతంపై పెన్షన్ విరాళం చెల్లిస్తున్న వారు, ఉమ్మడి ఆప్షన్ ఇవ్వని వారు యజమాని, ఉద్యోగి కలిసి 'హైయర్ పెన్షన్' కోసం జాయింట్ డిక్లరేషన్ ఇవ్వకుండానే, పరిమితికి మించి పెన్షన్ ఫండ్‌కు డబ్బులు కడుతున్న వారు ప్రభావితమవుతారు.

తప్పుడు విరాళాలు గుర్తించిన సందర్భాల్లో ఈపీఎఫ్ఓ ఆ నిధులను సర్దుబాటు చేయాలని ఆదేశించింది. అనుమతి లేకుండా పెన్షన్ ఫండ్‌కు (EPS) అదనంగా చేరిన మొత్తాన్ని తిరిగి ఉద్యోగి ప్రావిడెంట్ ఫండ్ (EPF) ఖాతాలోకి బదిలీ చేస్తారు. పీఎఫ్ ఖాతాలో ఉండాల్సిన సొమ్ము పెన్షన్ ఫండ్‌లో ఉన్నందున, ఆ కాలానికి రావాల్సిన వడ్డీని కూడా లెక్కించి సర్దుబాటు చేయాల్సి ఉంటుంది. ఒకవేళ సభ్యుడు నిజంగానే ఎక్కువ పెన్షన్ పొందాలని భావిస్తే, యజమానితో కలిసి సరైన పద్ధతిలో ఉమ్మడి డిక్లరేషన్ సమర్పించాల్సి ఉంటుంది.

మీ ఈపీఎఫ్ పాస్‌బుక్‌ను ఒకసారి జాగ్రత్తగా పరిశీలించండి. మీ పెన్షన్ విరాళం ప్రతి నెలా స్థిరంగా రూ. 1,250 (లేదా పాత పరిమితుల ప్రకారం రూ. 541/రూ. 417) ఉందో లేదో చూసుకోండి. ఒకవేళ అది మీ జీతాన్ని బట్టి మారుతూ, పరిమితి కంటే ఎక్కువగా ఉంటే, వెంటనే మీ కంపెనీలోని హెచ్ఆర్ (HR) లేదా పీఎఫ్ విభాగాన్ని సంప్రదించి అవసరమైన సవరణలు చేసుకోవడం ఉత్తమం.