మరో బాంబు పేల్చిన వర్మ

లక్ష్మీస్ ఎన్టీఆర్’ ట్రైలర్‌తో సినీ, రాజకీయ వర్గాల్లో ప్రకంపనలు రేపిన వర్మ ఆ వేడి చల్లారకముందే మరో సంచలన వీడియోను వదిలారు. ‘లక్ష్మీస్ ఎన్టీఆర్’ అసలు కథ ఇదే అంటూ వెన్నుపోటుపై రెండు నిమిషాల వివాదాస్పద వీడియోను విడుదల చేశారు. ఇందులో.. ‘ఎన్టీఆర్ 1989 అసెంబ్లీ ఎన్నికల్లో దారుణంగా ఓడిపోయి అధికారం కోల్పోయిన సమయంలో ఆయన కుటుంబీకులు, పార్టీ మెంబర్లు ఆయన్ని ఏకాకిగా వదిలేసిన టైంలో లక్ష్మీ పార్వతి అనే స్త్రీ ఆయన జీవితంలోకి ప్రవేశించింది. వారిద్దరి మధ్య ఏర్పడిన సంబంధం ఆంధ్రప్రదేశ్ రాజకీయ రూపురేకల్ని అతలాకుతలం చేసేసి పర్మినెంట్‌గా ఎలా చెరగని ముద్ర వేసిందన్నదే ఈ సినిమా సారాంశం.
ఈ సినిమా ఉద్దేశం గతం 25 ఏళ్లుగా నిజాలుగా చలామణీ అవుతున్న సిగ్గులేని అబద్దాల్ని శాశ్వతంగా నిజం అనబడే ఓ గోతిలో పాటిపెట్టడం. రాజకీయ మోసగాళ్ల మొహాలపై ముసుగులు తీసి పారేసి వారి అసలు వికార నగ్నత్వాన్ని అందరికీ చూపెట్టడం. అలాగే లక్ష్మీ పార్వతితో ఎన్టీఆర్‌కి ఉన్న సంబంధం వెనుక ఉన్న రహస్యం. వైశ్రాయి ఉదతం వెనుక ఉన్న అత్యంత నీచమైన కుట్రలు.. ఎన్టీఆర్ చివరి రోజుల్లో బోరు బోరున ఏడ్చిన కుమిలిపాటుని కూడా సవివరంగా ఈ చిత్రం చూపిస్తుంది’ అంటూ వర్మ వాయిస్‌తో రెండు నిమిషాల వీడియోను విడుదల చేశారు. ప్రస్తుతం ఈ వీడియో సోషల్ మీడియాలో వైరల్ అవుతుంది. లక్ష్మీస్ ఎన్టీఆర్ చిత్రంలో పి. విజయ్ కుమార్ ఎన్టీఆర్ పాత్రలో నటిస్తుండగా.. యజ్ఞ శెట్టి లక్ష్మీ పార్వతిగా నటించింది. చంద్రబాబు నాయుడుగా శ్రీతేజ్.. నందమూరి బాలయ్యగా ఆర్ జె బాలు తదితరులు నటించారు. రామ్ గోపాల్ వర్మ, అగస్త్య మంజు సంయుక్త దర్శకత్వం వహించారు. జీవీ ఫిల్మ్స్ బ్యానర్‌లో రాకేష్ రెడ్డి, దీప్తి బాలాగిరి నిర్మించారు. కళ్యాణ్ మాలిక్ సంగీతం అందించారు.