శ్రీ రెడ్డి పై దాడి జరిగిందట...

టాలీవుడ్‌లో క్యాస్టింగ్ కౌచ్ విషయంలో నటి శ్రీరెడ్డి చేసిన పోరాటం అందరికీ తెలుసు. దానిపై కొందరు పాజిటివ్‌గా స్పందిస్తే, మరికొందరు నెగెటివ్‌గా రివర్స్ అయ్యారు. సినిమా ఇండస్ట్రీలో మహిళలకు జరుగుతున్న అన్యాయాన్ని శ్రీరెడ్డి బహిరంగంగా ప్రశ్నించింది. మూవీ ఆర్టిస్ట్స్ అసోసియేషన్‌లో తనకూ సభ్యత్వం ఇవ్వాల్సిందేనని పట్టుపట్టింది. దానిపై పెద్ద చర్చే జరిగింది. ఆమె పోరాటం ముందు దిగివచ్చిన మా సభ్యులు... సభ్యత్వం ఇచ్చేందుకు ఒప్పుకున్నారు. ఇక అప్పటి నుంచీ క్యాస్టింగ్ కౌచ్‌పై తాను పోరాటం సాగిస్తూనే ఉంటానని ప్రకటించిన శ్రీరెడ్డి... ఏడాది నుంచీ సినిమాలకు దూరంగా ఉంది. ఇప్పుడు తమిళనాడులోని పొల్లాచ్చిలో కోలీవుడ్‌కి చెందిన మహిళలు క్యాస్టింగ్ కౌచ్ సమస్య ఎదుర్కొంటున్నారని తెలుసుకున్న శ్రీరెడ్డి... వెంటనే చెన్నై వెళ్లి మానవ హక్కుల సంఘాన్ని ఆశ్రయించింది. క్యాస్టింగ్ కౌచ్ వ్యవహారంలో సుబ్రహ్మణ్యం అనే వ్యక్తిని పిలిపించి మాట్లాడాలని చూస్తే తనపై దాడి చేసేందుకు యత్నించాడని శ్రీరెడ్డి తన కంప్లైంట్‌లో తెలిపింది.

మహిళలకు అన్యాయం జరిగితే ఒప్పుకునేది లేదని శ్రీరెడ్డి స్పష్టం చేసింది. బాధితులు ఎక్కడున్నా అక్కడకు వెళ్లి న్యాయం జరిగేవరకూ పోరాడతానంది. ఇప్పుడు చెన్నైలో మానవ హక్కుల సంఘం ఎలాంటి ఆదేశాలిస్తుందన్నది ఆసక్తి రేపుతోంది.

టాలీవుడ్‌లో క్యాస్టింగ్ కౌచ్ వ్యవహారంపై చర్చ మొదట చిన్నగా మొదలై... తర్వాత దేశవ్యాప్తంగా దుమారం రేపింది. బాలీవుడ్‌లోనూ భిన్నాభిప్రాయాలు వ్యక్తమయ్యాయి. తాజాగా కోలీవుడ్‌లో ఇది ఎక్కడి దాకా వెళ్తుందన్నది ఇప్పుడే చెప్పలేం. HRC తీసుకునే నిర్ణయం దానికి శ్రీరెడ్డి స్పందించే తీరును బట్టీ... వ్యవహారం తీవ్రత కొనసాగనుంది.