'యానిమల్' విజయ సభలో పాల్గొన్న తమన్నా

అటు హిందీలోనూ, ఇటు దక్షిణాదిలోనూ అగ్రనటులతో సినిమాలు చేస్తూ బాగా బిజీగా వుండే నటీమణుల్లో తమన్నా భాటియా ఒకరు. గత సంవత్సరం 'లస్ట్ స్టోరీస్ 2' వెబ్ సినిమాలో ఒక బోల్డ్ పాత్రలో కనిపించి అభిమానులను సంభ్రమాశ్చర్యాలకు గురి చేశారు తమన్నా. అలాగే తన వ్యక్తిగత జీవితంలో కూడా సహచర నటుడు విజయ్ వర్మతో రిలేషన్ షిప్ లో వున్నాను అని ఎటువంటి అరమరికలు లేకుండా అభిమానులతో పంచుకున్నారు.గత సంవత్సరం రజినీకాంత్ నటించిన 'జైలర్' లో తమన్నా కూడా ఒక ముఖ్య పాత్రలో కనిపించడమే కాకుండా అందులో 'నువ్వు కావాలయ్యా, కావాలి' అనే పాటలో తళుక్కున మెరిశారు కూడా. ఆ పాట ఎంత పెద్ద హిట్ అయిందో, వైరల్ అయిందో అందరికీ తెలిసిన విషయమే.అలాగే చిరంజీవితో 'భోళా శంకర్' లో కూడా తమన్నా కథానాయికగా నటించారు. ఈ సినిమా అంతగా ఆడకపోయినా, ఇందులోని పాటలు బాగా ప్రాచుర్యం పొందాయి. అలాగే గత సంవత్సరం తమన్నా ఒక మలయాళం సినిమా 'బాంద్రా' లో కూడా నటించారు. ఆమె మొదటిసారిగా ఈ సినిమాతో ఒక మలయాళం సినిమాలో నటించడం జరిగింది.తమన్నా సినిమాలోనే కాకుండా వెబ్ సిరీస్ లు కూడా ఎక్కువగానే చేస్తున్నారు. గత సంవత్సరం 'జీ ఖర్దా' అనే వెబ్ సిరీస్ లో ఇంకో బోల్డ్ పాత్రలో కనిపించారు. అలాగే 'ఆఖరి సచ్' అనే వెబ్ సిరీస్ లో కూడా నటించి మెప్పించారు తమన్నా.ఇప్పుడు సామజిక మాధ్యమాల్లో ఎక్కడ చూసిన తమన్నా ఫోటోలో వైరల్ అవుతూ కనిపిస్తున్నారు. ఇంతకీ ఎందుకు ఆమె ఫోటోస్ వైరల్ అవుతున్నాయి అంటే ఆమె 'యానిమల్' సినిమా విజయోత్సవ సభకి ప్రత్యేక అతిధిగా హాజరయ్యారు. రణబీర్ కపూర్, రష్మిక మందన్న నటించిన ఈ 'యానిమల్' సినిమాకి సందీప్ వంగా దర్శకుడు. ఈ సినిమా చాలా పెద్ద విజయం సాధించింది. అందుకని ఈ సినిమా విజయోత్సవ వేడుకలు ముంబైలో జరిగినప్పుడు తమన్నా హాజరయినప్పుడు తీసిన ఆమె ఫోటోలు ఇప్పుడు విపరీతంగా వైరల్ అవుతున్నాయి.