వంద కోట్ల క్లబ్ లో దూసుకుపోతున్న తండేల్

కొత్త సంవత్సరం మొదటి నెల జనవరిలో 23 సినిమాలు విడుదలైతే... ఫిబ్రవరి నెలలోనూ అనే చిత్రాలు రిలీజ్ అయ్యాయి. జనవరిలో పదిహేను స్ట్రయిట్ మూవీస్, ఎనిమిది అనువాద చిత్రాలు వచ్చాయి. బట్ ఫిబ్రవరికి వచ్చేసరికీ అనువాద చిత్రాలు ఆరు మాత్రమే వచ్చాయి. ఇందులో అజిత్ 'పట్టుదల' ఆశించిన స్థాయిలో ఆడలేదు. అలానే చివరి వారంలో వచ్చిన ఆది పినిశెట్టి 'శబ్దం', రవి మోహన్ 'అగత్యా' తమ ప్రభావాన్ని చూపించలేకపోయాయి. విశేషంగా ప్రదీప్ రంగనాథన్ నటించిన అనువాద చిత్రం 'రిటర్న్ ఆఫ్ ది డ్రాగన్', ధనుష్  దర్శకత్వం వహించిన 'జాబిలమ్మ నీకు అంతకోపమా' ఫర్వాలేదనిపించాయి. ఆంగ్ల అనువాద చిత్రం 'కెప్టెన్ అమెరికా: బ్రేవ్ న్యూ వరల్డ్' సైతం తెలుగు వారిని ఏమంతగా ఆకట్టుకోలేదు.ఫిబ్రవరి మాసంలో విడుదలైన అనువాద చిత్రాల కథ ఇలా ఉంటే... జనం ముందుకు వచ్చిన 17 స్ట్రయిట్ తెలుగు సినిమాల్లో కేవలం 'తండేల్'  మాత్రమే తన సత్తాను చాటింది. ఫిబ్రవరి 7న విడుదలైన ఈ సినిమా తొలిసారి నాగచైతన్యను వంద కోట్ల క్లబ్ లోకి తీసుకెళ్ళింది. ఉత్తరాంధ్ర జాలర్ల నిజ జీవిత సంఘటనల ఆధారంగా ఈ సినిమాను గీతా ఆర్ట్స్ సంస్థ నిర్మించగా, చందు మొండేటి దర్శకత్వం వహించాడు. సాయిపల్లవి  కథానాయికగా చేసింది. ఇటీవల శివరాత్రి కానుకగా ఈ సినిమాలోని అర్థనారీశ్వర తత్త్వాన్ని తెలిపే పూర్తి వీడియో సాంగ్ ను మేకర్స్ విడుదల చేశారు. దేవిశ్రీ ప్రసాద్ సమకూర్చిన సంగీతం ఈ సినిమాను విజయతీరాలకు చేర్చింది. పలుమార్లు వాయిదా పడిన 'తండేల్'కు పూర్తి స్థాయిలో పాజిటివ్ టాక్ రాకపోయినా... ఈ మధ్య కాలంలో విడుదలైన చిత్రాలలో ఇదే బెటర్ మూవీ అనిపించుకుంది. దాంతో వంద కోట్ల క్లబ్ లో మొదటి వారంలోనే ఈ సినిమా చేరిపోయింది.