ఎందరో స్టార్ హీరోలకు నటగురువుగా దేవదాస్ కనకాల
cinema | Suryaa Desk | Published : Fri, Aug 02, 2019, 09:36 PM
ప్రముఖ దర్శకుడు, నటుడు, ఎందరో స్టార్ హీరోలకు నటగురువు అయిన దేవదాస్ కనకాల ఇక లేరు. గత కొంతకాలంగా అనారోగ్యంతో బాధపడుతున్న ఆయన ఇవాళ కిమ్స్ ఆసుపత్రిలో తుదిశ్వాస విడిచారు. 1945 జులై 30న యానాం శివార్లలోని కనకాలపేటలో జన్మించిన దేవదాస్ కనకాల విశాఖపట్టణంలోని ఎ.వి.యన్ కాలేజీలో డిగ్రీ, ఆంధ్ర విశ్వవిద్యాలయంలో థియేటర్ ఆర్ట్స్ పూర్తిచేశారు. సాంగ్ అండ్ డ్రామా కేంద్ర ప్రభుత్వ పబ్లిసిటీ విభాగంలో నటుడిగా ఉద్యోగ జీవితాన్ని ఆరంభించిన ఆయన ఆ తర్వాతి కాలంలో సినీరంగంలోకి ప్రవేశించి నటుడిగా, దర్శకుడిగా ఆడియెన్స్ని మెప్పించడమే కాకుండా ఎందరో స్టార్ హీరోలకు నటగురువుగా శిక్షణ ఇచ్చారు. పూణే ఫిల్మ్ ఇనిస్టిట్యూట్లో విద్య అభ్యసించిన తొలితరం తెలుగువారిలో దేవదాస్ ఒకరు. అడయార్ ఫిల్మ్ ఇనిస్టిట్యూట్లో, మధు ఫిల్మ్ ఇనిస్టిట్యూట్లోను అధ్యాపకునిగా పనిచేసిన దేవదాస్ కనకాల తెలుగు విశ్వవిద్యాలయం రంగస్థల కళలశాఖలో అధ్యాపకునిగా, ఆ విభాగం అధిపతిగా సేవలు అందించారు. రజనీకాంత్, చిరంజీవి, రాజేంద్ర ప్రసాద్, శుభలేఖ సుధాకర్, నాజర్, ప్రదీప్ శక్తి, భానుచందర్, అరుణ్ పాండ్యన్, రాంకీ, రఘువరన్ వంటి ప్రముఖ సినీనటులు ఎందరో దేవదాస్ కనకాల వద్ద శిక్షణ తీసుకున్న వారే. ప్రముఖ సినీ నటుడు కాజీవ్ కనకాల ఆయన కుమారుడే అనే సంగతి ప్రత్యేకంగా చెప్పుకోవాల్సిన అవసరం లేదు. దేవదాస్ కనకాలకు కుమారుడు రాజీవ్ కనకాల, కుమార్తె శ్రీలక్ష్మి ఉన్నారు. దేవదాస్ కనకాల భార్య లక్ష్మీదేవి ఇటీవలే మృతి చెందారు.
|
|