నాపై వచ్చిన వన్నీ అసత్య ప్రచారాలే
cinema | Suryaa Desk | Published : Fri, May 02, 2025, 04:06 PM
జమ్మూ కాశ్మిర్ పహల్గామ్ ఉగ్రదాడి ఘటనలో పాకిస్థాన్ సైన్యం ప్రమేయం ఉందంటూ తన పేరుతో వైరల్ అయిన ఓ నకిలీ ప్రకటనపై పాకిస్థాన్ ప్రముఖ నటి హనియా ఆమిర్ తీవ్రంగా స్పందించింది. ఆ ప్రకటన పూర్తిగా కల్పితమని, దానితో తనకు ఎలాంటి సంబంధం లేదని స్పష్టం చేసింది. భారత్లో తన ఇన్స్టాగ్రామ్ ఖాతా బ్లాక్ అయిన నేపథ్యంలో ఆమె ఈ వివరణ ఇచ్చింది. ఏప్రిల్ 22న పహల్గామ్లో జరిగిన ఉగ్రదాడికి పాక్ సైన్యం, ఇస్లామిక్ ఉగ్రవాదులే కారణమంటూ హనియా ఆమిర్ వ్యాఖ్యానించినట్టుగా ఒక పోస్ట్ సోషల్ మీడియాలో చక్కర్లు కొట్టింది. భారత్లో కూడా మంచి గుర్తింపు తెచ్చుకున్న హనియా ఈ ఆరోపణలను గట్టిగా ఖండించింది. ‘ఆ ప్రకటన నేను చేయలేదు. అందులో పేర్కొన్న పదాలతో నేను ఏకీభవించను, వాటికి నేను కట్టుబడి లేను. అది పూర్తిగా కల్పితం, నా వ్యక్తిత్వాన్ని, నా విశ్వాసాలను అది తప్పుగా సూచిస్తోంది’ అని ఆమె తన ఇన్స్టాగ్రామ్ స్టోరీస్లో పేర్కొంది.
|
|