ఆంగ్ల భాష ఆధిపత్యంపై నటుడు విజయ్ దేవరకొండ ప్రశ్నలు

ప్రపంచవ్యాప్తంగా ఆంగ్ల భాషకు ఉన్న ప్రాధాన్యత, దాని ప్రభావంపై ప్రముఖ తెలుగు నటుడు విజయ్ దేవరకొండ ఆసక్తికర వ్యాఖ్యలు చేశారు. పాశ్చాత్య దేశాల సంస్కృతి మనకు ఎక్కువగా వారి సినిమాల ద్వారానే పరిచయమైందని ఆయన అభిప్రాయపడ్డారు. ముంబైలో జరిగిన 'వేవ్స్ సమ్మిట్ 2025' ప్యానెల్ చర్చలో ఆయన మాట్లాడారు.చాలా ఏళ్ల క్రితం పాశ్చాత్యులు మన దేశానికి వచ్చి వారి భాషను మనపై రుద్దడం వల్లే ఇప్పటికీ మనం ఇంగ్లీష్‌ను ఎక్కువగా వాడుతున్నామని విజయ్ పేర్కొన్నారు. దీనివల్ల హాలీవుడ్ సినిమాలకు ప్రపంచవ్యాప్తంగా ఎక్కువ ఆదరణ లభిస్తోందని, ఫలితంగా వారి బడ్జెట్లు, నటుల పారితోషికాలు భారీగా ఉంటున్నాయని వివరించారు.ఉదాహరణగా హాలీవుడ్ నటుడు బ్రాడ్ పిట్‌ను ప్రస్తావిస్తూ, "నేను ఒక సినిమా చేస్తే, బ్రాడ్ పిట్ ఒక సినిమా చేస్తే, ఆయనకు నాకంటే వంద రెట్లు ఎక్కువ పారితోషికం వస్తుంది. దీనికి కారణం ఎక్కువ మంది ఆయన భాష  సినిమాలు చూడటమే" అని విజయ్ అన్నారు. ఇది తన తప్పు కాదని, కొన్ని వందల ఏళ్ల క్రితం ఆ భాషను ప్రపంచవ్యాప్తం చేసిన వారి వల్లే ఈ పరిస్థితి ఏర్పడిందని ఆయన వ్యాఖ్యానించారు.మన పూర్వీకులు తెలుగు లేదా హిందీ వంటి భారతీయ భాషలను ప్రపంచానికి పరిచయం చేసి ఉంటే బాగుండేదని సరదాగా వ్యాఖ్యానించారు. సినిమా అనేది మన భాషను, సంస్కృతిని నిలబెట్టే శక్తివంతమైన మాధ్యమమని, దానిని ప్రోత్సహించాల్సిన అవసరం ఉందని నొక్కి చెప్పారు. దక్షిణాది సినిమాలు బాలీవుడ్‌లో విస్తరించినట్లే, భారతీయ సినిమాలను కూడా పశ్చిమ దేశాల్లో ఎక్కువగా పంపిణీ చేయాల్సిన సమయం ఆసన్నమైందని విజయ్ దేవరకొండ అభిప్రాయపడ్డారు. ఈ కార్యక్రమంలో కరీనా కపూర్, కరణ్ జోహార్ కూడా పాల్గొన్నారు.