![]() |
![]() |
by Suryaa Desk | Tue, Aug 13, 2024, 07:40 PM
కాళ్లతో తొక్కుతూ అల్లం వెల్లుల్లి పేస్టును తయారు చేస్తున్న ఓ ఘటన ఇప్పుడు అందరినీ షాక్ అయ్యేలా చేస్తోంది. ఇందుకు సంబంధించిన వీడియో ఒకటి సోషల్ మీడియాలో చక్కర్లు కొడుతోంది. ఈ దారుణం.. హైదరాబాద్ మలక్పేటలోని శంకర్నగర్లో ఉన్న ఓ వెల్లుల్లి ఫ్యాక్టరీలో జరిగినట్టు తెలుస్తోంది. ఈ వీడియోలో.. అల్లంవెల్లుల్లిని కాళ్లతో తొక్కుతూ.. చూస్తేనే వొకారం వచ్చేలా మిశ్రమాన్ని తయారు చేస్తున్నారు. అయితే ఇది ఎప్పుడు జరిగిందనేది.. క్లారిటీగా తెలియరాలేదు. కాగా.. ఈ వీడియోలో చిన్నారుల చేత ఈ పేస్టు తయారీ పనులు చేయిస్తున్నట్లుగా తెలుస్తోంది.
అయితే.. ఇప్పటికే హైదరాబాద్ నగరంలో కల్తీ అల్లం పేస్టును తయారు చేసి యథేచ్చగా విక్రయిస్తున్న ఘటనలు వెలుగు చూస్తున్న విషయం తెలిసిందే. ప్రజల ఆరోగ్యాన్ని గాలికి వదిలేసి.. నిబంధనలకు నీళ్లొదిలేసి.. కల్తీరాయుళ్లు ఇలా.. ఎలాంటి అనుమతులు లేకుండా అక్రమంగా వ్యాపారాలు చేస్తూ సొమ్ము చేసుకుంటున్నారు. ఇప్పటికే.. నగరంలోనే చాలా అక్రమ వ్యాపారాలను గుర్తించి చర్యలు తీసుకున్నా కూడా.. ఏమాత్రం భయం లేకుండా కొందరు తమ కల్తీ దందాలను కంటిన్యూ చేస్తున్నారు. ఇలాంటి వీడియోలు చూస్తుంటే.. ప్రజలు బయట ఏమైనా కొనాలంటేనే ఒకటికి వందసార్లు ఆలోచించాల్సిన పరిస్థితి నెలకొంది.