![]() |
![]() |
by Suryaa Desk | Tue, Aug 13, 2024, 09:16 PM
ప్రభుత్వ హాస్టల్స్ టార్గెట్గా తెలంగాణ వ్యాప్తంగా ఏసీబీ రైడ్స్ జరుగుతున్నాయి. ఇవాళ ఉదయం నుంచి ఏసీబీ అధికారులు హాస్టల్స్లో తనిఖీలు ముమ్మరం చేశారు. రాష్ట్రవ్యాప్తంగా ఉన్న ప్రభుత్వ ఎస్సీ, మైనార్టీ, బీసీ హాస్టల్స్లో తనిఖీలు ముమ్మరంగా సాగుతున్నాయి. 33 జిల్లాల్లోని ఏసీబీ అధికారులు క్షుణ్ణంగా తనిఖీలు చేస్తున్నారు. ఏసీబీతో పాటు లీగల్ మెట్రాలాజీ, శానిటేషన్, ఫుడ్ఇన్స్పెక్టర్, పే అండ్ అకౌంట్స్ శాఖల అధికారులు సోదాల్లో పాల్గొన్నారు. ప్రభుత్వ హాస్టల్స్లో ఎంత మంది విద్యార్థులు ఉంటున్నారు ? రికార్డుల్లో ఎంత మంది విద్యార్థుల వివరాలు ఉన్నాయి? ఆహార నాణ్యత, విద్యార్థులకు హాస్టల్స్లో అందుతున్న సౌకర్యాలపై ఏసీబీ అధికారులు ఆరా తీస్తున్నారు.
రికార్డులను పరిశీలించటంతో పాటు విద్యార్థులతోనూ ముఖాముఖి మాట్లాడి సౌకర్యాలపై ఆరా తీసి వివరాలు నమోదు చేసుకుంటున్నారు. ఈ తనిఖీలు నేటి సాయంత్రం వరకు కొనసాగే అవకాశం ఉన్నట్లు సమాచారం. ప్రభుత్వ హాస్టల్స్లో అవకతవకలు జరుగుతున్నాయని గత కొంత కాలంగా ఆరోపణలు వస్తున్నాయి. తప్పుడు బిల్లులతో కొందరు అధికారులు విద్యార్థులకు అందించాల్సిన ఆహారం, ఇతర వస్తువులు పక్కదారి పట్టిస్తూ సర్కార్ ఖజానాకు గండి కొడుతున్నట్లు ఫిర్యాదులు అందాయి. అలాగే హాస్టళ్లలో విద్యార్థులకు అందించే ఆహారంలోనూ నాణ్యత ఉండట్లేదని.. ఈ మధ్య కాలంలో పలువురు విద్యార్థులు అస్వస్థతకు గురైన నేపథ్యంలో ఏసీబీ రైడ్స్ జరుగుతున్నట్లు తెలిసింది.
కాగా, ఈ తనిఖీలపై ఏసీబీ డీఎస్పీ సాంబయ్య స్పందించారు. గురుకులాల్లోనూ తనిఖీలు కొనసాగిస్తున్నామని చెప్పారు. విద్యార్థుల సంఖ్య ఎక్కువగా చూపిస్తున్నారన్నారు. కానీ లెక్కలు చూస్తే చాలా తేడాలున్నాయని చెప్పారు. విద్యార్థులకు మెనూ ప్రకారం ఆహారం ఇవ్వటం లేదనే విషయం తమ దృష్టికి వచ్చిందన్నారు. టాయిలెట్లు కూడా శుభ్రం లేవని.. చాలా దుర్గందంగా మారాయిని అన్నారు. చాలా హాస్టళ్లలో వాటల్ లీకేజీలు ఉన్నాయని.. విద్యార్థుల స్టేట్మెంట్ రికార్డు చేస్తున్నట్లు చెప్పారు. ఈ నివేదికను ప్రభుత్వానికి అందజేయనున్నట్లు ఆయన వెల్లడించారు. కాగా, ఈ తనిఖీలకు సంబంధించిన పూర్తి వివరాలు సాయంత్రానికి వచ్చే అవకాశం ఉంది. రాష్ట్రవ్యాప్త తనిఖీల తర్వాత వివరాలు వెల్లడి కానున్నాయి.