![]() |
![]() |
by Suryaa Desk | Wed, Aug 14, 2024, 07:51 PM
పక్క రాష్ట్రమైన ఆంధ్రప్రదేశ్తో తమకు ఎలాంటి పోటీ లేదని.. తెలంగాణ సీఎం రేవంత్ రెడ్డి స్పష్టం చేశారు. తమ పోటీ పక్క రాష్ట్రాలతో కాదని.. ప్రపంచంతోనే తమ ప్రధాన పోటీ అని చెప్పుకొచ్చారు. పక్క రాష్ట్రాలైన ఏపీ, తమిళనాడు, కర్ణాటకతో పోటీపడే స్థాయి నుంచి ప్రపంచంతో పోటీపడే స్థాయికి ఎప్పుడో ఎదిగామని రేవంత్ రెడ్డి పేర్కొన్నారు. ప్రపంచానికి ఏం కావాలన్న ఇచ్చే స్థాయికి తెలంగాణ ఎదిగేలా చేయటమే తన టార్గెట్ అని చెప్పుకొచ్చారు. అందుకోమే.. ఫ్యూచర్ సిటీని నిర్మించాలని టార్గెట్గా పెట్టుకున్నట్టు వివరించారు. ఇప్పటికే హైదరాబాద్ను మూడు నగరాలుగా పిలుస్తున్నామని.. ఇక ఫోర్త్ సిటీగా ఫ్యూచర్ సిటీని డెవలప్ చేస్తామని రేవంత్ రెడ్డి తెలిపారు.
ఇక.. హైదరాబాద్లో అంతర్జాతీయ ఎయిర్ పోర్ట్ ఉందని.. ఔటర్ రింగ్ రోడ్డు ఉందని, సైబర్ సిటీ ఉందని.. ముఖ్యంగా తన దగ్గర హైదరాబాద్ ఉందంటూ సీఎం రేవంత్ రెడ్డి వివరించారు. ఇవేవి పొరుగు రాష్ట్రాల దగ్గర లేవని చెప్పుకొచ్చారు. ఈ క్రమంలో.. ఏపీపై పరోక్షంగా పలు కామెంట్లు చేశారు రేవంత్. ఏపీలో ప్రభుత్వం మారగానే.. హైదరాబాద్లో ఉన్న కంపెనీలు ఏపీకి తరలిపోతాయంటూ చర్చ జరిగిందని.. అలాంటిదేమీ లేదని చెప్పుకొచ్చారు. తెలంగాణలో ఎన్ని ప్రభుత్వాలు మారిన.. హైదరాబాద్ అభివృద్దే లక్ష్యంగా పని చేశాయని.. తాము కూడా అంతకుమించి అభివృద్ధి చేసేలా కృషి చేస్తామని చెప్పుకొచ్చారు.
హైదరాబాద్లో ప్రముఖ ఐటీ దిగ్గజ సంస్థ కాగ్నిజెంట్ తన ఐదో క్యాంపస్ శంకుస్థాపన కార్యక్రమంలో పాల్గొన్న సీఎం రేవంత్ రెడ్డి ఈ మేరకు ఇంట్రెస్టింగ్ కామెంట్లు చేశారు. తెలంగాణలో అత్యధికంగా ఉద్యోగాలు ఇస్తున్న రెండో సంస్థ కాగ్నిజెంట్ అని తెలిపారు. అమెరికా, దక్షిత కొరియాలో తాము కలిసిన ప్రతి ఒక్క వ్యాపారవేత్త, కార్పొరేట్ సంస్థలు హైదరాబాద్లో పెట్టుబడులు పెట్టేందుకు సానుకూలంగా ఉన్నాయని చెప్పేందుకు సంతోషిస్తున్నానని తెలిపారు. వచ్చే 10 ఏళ్లలో తెలంగాణను ఒక ట్రిలియన్ డాలర్ల ఆర్థిక వ్యవస్థగా మార్చాలనేది తమ సంకల్పమని రేవంత్ రెడ్డి పేర్కొన్నారు.
కాగ్నిజెంట్ విస్తరణకు పూర్తి మద్దతు ఉంటుందని రేవంత్ రెడ్డి హామీ ఇచ్చారు. మాజీ ప్రధాని రాజీవ్ గాంధీ కృషితోనే హైదరాబాద్లో ఐటీ అభివృద్ధికి పునాది పడిందన్నారు. హైదరాబాద్లాగే కాగ్నిజెంట్ కూడా అంచెలంచెలుగా అభివృద్ధి చెందిందని తెలిపారు. భవిష్యత్తులో కూడా తమ ప్రభుత్వం నిర్మించబోయే ఫ్యూచర్ సిటీలో కూడా కాగ్నిజెంట్ సంస్థ పాత్ర ఉండాలని రేవంత్ రెడ్డి ఆకాంక్షించారు.
రాజకీయంగా భిన్నాభిప్రాయాలు ఉన్నా.. హైదరాబాద్ను అభివృద్ధి చేయడంలో ఎలాంటి భేషజాలు లేవని రేవంత్ రెడ్డి మరోసారి స్పష్టం చేశారు. హైదరాబాద్ నగరం పెట్టుబడులకు చాలా అనువైన ప్రాంతమని.. గతంలో ఉన్న ఇండస్ట్రీయల్ పాలసీలను కంటిన్యూ చేయటమే కాకుండా.. మరింత మెరుగ్గా అమలు చేస్తామని రేవంత్ రెడ్డి తెలిపారు. పరిశ్రమలు స్థాపించేందుకు కావలసిన సౌకర్యాలను తెలంగాణ ప్రభుత్వం అందిస్తుందని.. పారిశ్రామిక వేత్తలకు సీఎం రేవంత్ రెడ్డి పిలుపునిచ్చారు.