వామ్మో.. వీడి తెలివికి కళ్లు బైర్లుకమ్మాల్సిందే.. సరుకు మొత్తం బనియన్‌లో సర్దేశాడుగా

మందు కోసం యుద్ధం చేయాటానికైనా సిద్ధపడిపోతుంటారు మద్యం ప్రియులు. రెగ్యులర్‌గా మందు తాగేవాళ్లకు ఒక్కరోజు దొరకకపోయినా, తాగినప్పటికీ సరిపోకపోయినా.. ఆగమాగం చేస్తుంటారు. మందు కోసం ఎంత కష్టమైనా సరే ఎదుర్కొంటారు.. ఎన్ని మైళ్లయినా సరే ప్రయాణం చేసి.. చివరికి వాళ్లకు కావాల్సింది సాధిస్తుంటారు. అర్ధరాత్రి వైష్ షాప్ బందయితేనే.. డబుల్ రేటు పెట్టయినా సరే, పోలీసుల కంటపడకుండా బాటిల్ దక్కించుకుంటారు. ఈ క్రమంలో మందుబాబుల తెలివి అద్భుతంగా పని చేస్తుందనుకుంటా.. మందు దక్కించుకునేందుకు వాళ్లు చేసే పోరాటంలో పోలీసులకు దొరకకుండా అదిరిపోయే ఐడియాలు వేస్తుంటారు. ఇలా ఓ మందుబాబు ఐడియాకు పోలీసులకే కాదు, స్థానికలకు కూడా దిమ్మతిరిగిపోయింది.

రాత్రి సమయంలో దుకాణం బందయితేనే మందు కోసం మద్యంప్రియులు నానా తిప్పలు పడుతుంటే.. మరి మద్యం పూర్తిగా నిషేదం అయిన ప్రాంతాల్లో ఉంటున్న మందుబాబుల పరిస్థితి ఎలా ఉంటుందో అర్థం చేసుకోవచ్చు. అయితే.. వాళ్లందరి కోసం.. ఓ మందుబాబు వినూత్నంగా ఆలోచించాడు. ఎప్పటి నుంచి ఆ పద్ధతి ఫాలో అవుతున్నాడో కానీ.. చివరికి పోలీసులకు అడ్డంగా దొరికిపోయాడు.

ఆదిలాబాద్ జిల్లా భీంసరి గ్రామానికి చెందిన మునీశ్వర్ సత్యనారాయణ అనే వ్యక్తి అక్రమ మద్యాన్ని తరలించేందుకు ఇంట్రెస్టింగ్ ఐడియా వేశాడు. కేవలం అతను ధరించిన దుస్తులనే సాధనంగా వాడుకున్నాడు. షర్ట్ లోపల వేసుకునే బనీయన్‌కి ఏకంగా 54 జేబులు కుట్టించుకున్నాడు. ఇక అందులో.. మద్యం సీసాలు పెట్టుకుని ఎంచక్కా సరఫరా చేయొచ్చనుకున్నాడు. ప్లాన్ ప్రకారమే.. మహారాష్ట్రకు వెళ్లి.. 48 దేశీదారు సీసాలు కొనుగోలు చేసి.. ఆ జేబుల్లో దాచుకుని రైల్‌లో ఆదిలాబాద్‌కు వచ్చాడు.

ఆదిలాబాద్ రైల్వే స్టేషన్‌లో దిగడమే ఆలస్యం.. రైల్వే పోలీసులు పట్టేసుకున్నారు. ముందే పోలీసులకు సమాచారం అందిందా ఏంటీ అనుకుంటే పొరపాటే.. అసలు విషయం ఏమిటంటే.. చూడటానికి సన్నగా ఉన్న సత్యనారాయ.. నడుము నుంచి పైభాగం కొంత ఉబ్బినట్టుగా కనిపించటం.. నడక కూడా కొంత తేడాగా ఉండటంతో.. అనుమానం వచ్చి వెంటనే అదుపులోకి తీసుకున్నారు పోలీసులు. చెక్ చేయగా.. సత్యనారాయణ బనియన్‌లో మద్యం బాగోతం బట్టబయలైంది. బనియన్‌లో మద్యం దాయటం చూసి.. పోలీసులు అవాక్కయ్యారు. మద్యం సీసాలను స్వాధీనం చేసుకుని.. అతన్ని అరెస్ట్ చేశారు.