సీఎం రేవంత్ రెడ్డిని వెంటాడుతున్న ప్రమాదాలు.. కాన్వాయ్‌లో పేలిన కారు టైరు.. నెల రోజుల్లో మూడోది

లోక్‌సభ ఎన్నికల నోటిఫికేషన్‌కు తేదీ దగ్గరపడుతుండటంతో పార్టీలు ప్రచారంలో మునిగిపోయాయి. ముఖ్యమంత్రి రేవంత్ రెడ్డి కూడా భారీ బహిరంగ సభలు పెట్టి ప్రచారం చేస్తున్నారు. ఇక ఇటీవలె తుక్కుగూడ సభలో కాంగ్రెస్ ఎన్నికల మేనిఫేస్టోను ఆ పార్టీ జాతీయ అధ్యక్షుడు మల్లిఖార్జున ఖర్గే, అగ్రనేత రాహుల్ గాంధీ విడుదల చేశారు. దీంతో కాంగ్రెస్ శ్రేణుల్లో సరికొత్త ఉత్సాహం నెలకొంది. ఈ క్రమంలోనే తుక్కుగూడ సభ తర్వాత కాంగ్రెస్ పార్టీ రాష్ట్రంలో మరింత జోరుగా ప్రచారం జరుపుతోంది. ఈ నేపథ్యంలోనే పలువురు బీఆర్ఎస్ నేతలు కాంగ్రెస్ పార్టీ కండువా కప్పుకుంటున్నారు. ఇక సీఎం రేవంత్ రెడ్డి సోమవారం తన సొంత నియోజకవర్గం కొడంగల్ వెళ్తుండగా ప్రమాదం జరిగింది.

హైదరాబాద్ నుంచి కొడంగల్ వెళ్తుండగా.. సీఎం రేవంత్‌ రెడ్డి కాన్వాయ్‌లో ఉన్న ఒక ల్యాండ్ క్రూజర్ వాహనం టైర్ ఒక్కసారిగా పేలింది. దీంతో ఒక్కసారిగా సీఎం భద్రతా సిబ్బంది అలర్ట్ అయ్యారు. ముఖ్యమంత్రి రేవంత్ రెడ్డి కొడంగల్ వెళ్తుండగా.. వికారాబాద్ జిల్లా మన్నెగూడ వద్ద ఈ సంఘటన జరిగింది. ఈ ఘటనతో అందరూ భయాందోళనకు గురికాగా.. అక్కడ ఏం జరుగుతుందో కొద్దిసేపు అర్థం కాక అంతా షాక్‌లో ఉండిపోయారు. ఈ క్రమంలోనే సెక్యూరిటీ సిబ్బంది కారు టైరు పేలిందని గుర్తించారు.

వెంటనే ఆ కారు పేలిన టైరును తొలగించి.. మరో టైరును బిగించారు. అనంతరం.. మళ్లీ సీఎం కాన్వాయ్.. మొయినాబాద్ మీదుగా కొడంగల్ సభకు బయల్దేరింది. ఈ ఘటనలో మనుషులకు గానీ, వాహనాలకు గానీ ఎలాంటి ప్రమాదం జరగకపోవడంతో అంతా ఊపిరి పీల్చుకున్నారు. అయితే గత నెలలో సీఎం రేవంత్ రెడ్డి ప్రయాణిస్తున్న విమానంలో సాంకేతిక లోపం ఏర్పడింది. మార్చి 17 వ తేదీన సీఎం రేవంత్ రెడ్డితోపాటు డిప్యూటీ సీఎం భట్టి విక్రమార్క, రవాణా శాఖ మంత్రి పొన్నం ప్రభాకర్, కాంగ్రెస్ తెలంగాణ వ్యవహారాల ఇన్‌ఛార్జ్ దీపాదాస్ మున్షీ ప్రయాణిస్తున్న విమానంలో సాంకేతిక లోపం ఏర్పడింది. దాన్ని సమయానికి గుర్తించిన పైలట్లు.. వెంటనే ల్యాండింగ్ చేయడంతో ఎలాంటి ప్రమాదం జరగలేదు. దీంతో అందరూ ఊపిరి పీల్చుకున్నారు.

ఇక మార్చి 4 వ తేదీన సీఎం రేవంత్‌ రెడ్డి ప్రయాణిస్తున్న కాన్వాయ్‌లో ప్రమాదం జరిగింది. రాజన్న సిరిసిల్ల జిల్లా ఎల్లారెడ్డిపేట మండలం తిమ్మాపూర్ వద్ద వేగంగా వెళ్తున్న ముఖ్యమంత్రి కాన్వాయ్‌లో ఒకదానికొకటి 6 కార్లు ఢీకొన్నాయి. అయితే కార్లలోని ఎయిర్ బ్యాగులు తెరుచుకోవడంతో ముఖ్యమంత్రి రేవంత్ రెడ్డికి ఎలాంటి ప్రమాదం జరగలేదు. ఈ క్రమంలోనే నెల రోజుల వ్యవధిలోనే 3 సార్లు ఇలాంటి ప్రమాదాలు సీఎం రేవంత్ రెడ్డికి ఎదురయ్యాయి.