హైదరాబాద్లో జల కన్యలు.. చూడ్డానికి రెండు కళ్లు సరిపోవు
Telangana Telugu | Suryaa Desk | Published : Wed, May 22, 2024, 05:04 PM
టాలీవుడ్ హీరో విక్టరీ వెంకటేష్ నటించిన సాహస వీరుడు సాగర కన్య మూవీ చూశారా..? ఆ సినిమాలో శిల్పాశెట్టి సాగర కన్యగా మెప్పిస్తుంది. సముద్రంలో జలకన్యగా అలరిస్తుంది. జల కన్యలు ఉంటారని గ్రాఫిక్స్ సినిమాలు, కథల్లో చెప్పుకోవటం తప్ప.. నేరుగా ఎవరూ చూసింది లేదు. అయితే అప్పడప్పుడు సోషల్ మీడియాలో జలకన్యలు అంటూ కొన్ని ఫోటోలు, వీడియోలు వైరల్ అవుతుంటాయి. నడుం వరకు చేప ఆకారం ఉండి అందమైన అమ్మాయిలను జలకన్యలుగా కొందరు గ్రాఫిక్స్ ఫోటోలు, వీడియోలు వైరల్ చేస్తూ ఉంటారు.
ఇక విదేశాల్లో ముఖ్యంగా సముద్ర ప్రాంతాలను కలిగి ఉన్న దేశాల్లో జలకన్యల థీమ్తో ప్రత్యేక ఎగ్జిబిషన్ ఏర్పాటు చేసి ఆకట్టుకుంటారు. ఇలాంటి థీమ్ ఎగ్జిబిషన్ ఇప్పుడు హైదరాబాద్లోనూ నగర ప్రజలను అలరిస్తోంది. కూకట్పల్లిలో ఈ జల కన్యలు ఆకట్టుంటున్నారు. మెరైన్ పార్క్లో జరిగే ఎగ్జిబిషన్లో జల కన్యలతో నిర్వహకులు ప్రత్యేక ప్రదర్శన నిర్వహించారు. దేశంలోనే ఎక్కడా లేని విధంగా మొట్ట మొదటిసారి హైదరాబాద్లో ఈ థీమ్ ఎగ్జిబిషన్ ఏర్పాటు చేశారు. జలకన్య రూపంలో ఉన్న ముగ్గురు యువతులు నీటిలో విన్యాసాలు చేశారు. జలకన్యలను చూసేందుకు నగర ప్రజలు బారులు తీరుతున్నారు. నిజమైన జల కన్యలు ఎలా ఉంటారో తెలియని వారు ప్రదర్శనలో జలకన్యల రూపంలో ఉన్న యువతులను నిజమైన జలకన్యలుగా భావించి సెల్ఫీలు తీసుకుంటున్నారు.
|
|