గోల్కొండ బోనాలు ప్రారంభం, నెలరోజులు వైభవంగా జాతర

తెలంగాణ సంస్కృతి, సంప్రదాయాలకు అద్దం పట్టే బోనాల జాతర మెుదలైంది. నెల రోజుల పాటు ఇక పూనకాలు లోడింగే. హైదరాబాద్ మహా నగరంలో వైభవంగా జరిగే వేడుకల్లో బోనాలకు ప్రత్యేక గుర్తింపు ఉంది. ఆషాడ మాసంలో జరిగే ఈ బోనాల పండుగలను చూడటానికి రాష్ట్రం నలుమూలల నుంచి హైదరాబాద్ వస్తారు. ఇందులో భాగంగా ఈరోజు ఆషాడ మాసం తొలి బోనం గోల్కొండలోని జగదాంబికా మహంకాళి అమ్మవారికి భక్తులు సమర్పించారు. మధ్యాహ్నం 12 గంటలకు ఆలయ అర్చకులు తొలి బోనం సమర్పించారు. దీంతో గోల్కొండ పరిసర ప్రాంతాల్లో బోనాల సందడి మొదలైంది. డప్పు సప్పుడు, శివసత్తులు, పోతరాజులు విన్యాసాలతో పాతబస్తీ దద్దరిల్లిపోతోంది. అంతకు ముందు రాష్ట్ర ప్రభుత్వం తరపున అమ్మవారికి పట్టు వస్త్రాలు సమర్పించారు. నేడు గోల్కొండ జగదాంబిక బోనాల ఉత్సవాలతో ఆషాడ బోనాలు ప్రారంభం కాగా.. ఈ నెల 21న లష్కర్‌ సికింద్రాబాద్‌ ఉజ్జయిని మహాకాళి బోనాలు జరగనున్నాయి. 28న పాతబస్తీలోని లాల్‌దర్వాజా బోనాలు జరగనున్నాయి. ప్రధాన ఆలయాలతో పాటు బస్తీల్లో అమ్మవారి బోనాల వేడుకలూ నిర్వహించనున్నారు. గోల్కొండ జగదాంబ ఆలయంలో నేడు ప్రారంభమైన ఉత్సవాలు నెల రోజులపాటు జరగనున్నాయి. ప్రతి ఆదివారం, గురువారం బోనాల ఉత్సవాలు జరుగుతాయి. మొదటి బోనం పూజ, చివరి బోనం పూజ గోల్కొండ జగదాంబ అమ్మవారి ఆలయంలోనే జరగటం విశేషం.

సికింద్రాబాద్‌ ఉజ్జయిని మహాకాళి ఆలయంలో జరిగే బోనాలకు ఘనమైన చరిత్ర ఉంది. అక్కడ 1814 నుంచి బోనాల ఉత్సవాలు కొనసాగుతుండటం విశేషం. ఈ నెల 21న బోనాల సమర్పణ, 22న భవిష్యవాణి (రంగం) కార్యక్రమం నిర్వహించనున్నారు. అ తర్వాత అంబారీపై అమ్మవారి ఊరేగింపు, పలహారం బండ్ల ఊరేగింపు జరుగుతాయని ఉజ్జయిని ఆలయ అర్చకులు తెలిపారు. ఇక పాతబస్తీలో 11 రోజులపాటు ఉత్సవాలు కన్నుల పండువగా జరుగనున్నాయి. సింహవాహిని మహంకాళి ఆలయంతో పాటు ఉప్పుగూడ మహంకాళి ఆలయం, హరిబౌలి అక్కన్న మాదన్న మహంకాళి ఆలయం తదితర ప్రధాన దేవాలయాల్లో బోనాల వేడుకలు జరుగుతాయి.