ర్యాపిడో ద్వారా డ్రగ్స్ ,,,ఇంటికే డెలివరీ,,,ఇద్దరు యువకులు అరెస్ట్

ఓ యువకుడు ఫుడ్‌ డెలివరీ బాయ్‌ ముసుగులో గంజాయి, డ్రగ్స్ సరఫరా చేస్తున్నాడు. పక్కా సమాచారం మేరకు అతడి కదలికలపై నిఘా ఉంచిన టీజీ న్యాబ్‌ అధికారులు యువకుడిని పట్టుకుని రూ.12 లక్షల సరకు సీజ్ చేశారు. వివరాల్లోకి వెళితే.. ఏపీలోని రాజమహేంద్రవరానికి చెందిన షేక్‌ బిలాల్‌ ఇంటర్‌ వరకు చదివాడు. స్టూడెంట్‌గా ఉన్నప్పుడే గంజాయికి అలవాటుపడ్డాడు. అరకు నుంచి గంజాయిని తెప్పించుకునేవాడు. 2020లో కొవిడ్‌ సమయంలో హైదరాబాద్ నగరానికి వచ్చాడు. మాదాపూర్‌ ఇజ్జత్‌ నగర్‌లో ఓ ఇంట్లో అద్దెకు దిగాడు. అక్కడి నుంచి కావాల్సిన వారికి గంజాయి విక్రయించేవాడు. ఫుడ్‌ డెలివరీ బాయ్‌గా మారి ఐటీ ఉద్యోగులను టార్గెట్‌ చేసుకున్నాడు. వారికి గంజాయి అమ్మకాలు మొదలుపెట్టాడు. సొంతూరుకు చెందిన భాను తేజా అనే యువకుడి నుంచి ఎండీఎంఏ డ్రగ్స్ తెప్పించుకున్నాడు. వాటిని డెలివరీ బాయ్ ముసుగులో ఐటీ ఉద్యోగులకు విక్రయించేవాడు.

ఇలా డ్రగ్స్ విక్రయిస్తుండగా.. 2022లో బిలాల్‌ను జూబ్లీహిల్స్‌ పోలీసులు అరెస్టుచేశారు. అనంతరం జైలుకు వెళ్లి శిక్ష అనుభవించాడు. జైలు నుంచి విడుదలయ్యాక తిరిగి మళ్లీ డ్రగ్స్ విక్రయించే దందా మొదలుపెట్టాడు. అతడి కదలికలపై పక్కా నిఘా ఉంచిన పోలీసులు.. దాడి చేసి గదిలో దాచిన 22.5కిలోల గంజాయిని, 15 గ్రాముల నిషేదిత ఎండీఎంఏ డ్రగ్స్, 76 నైట్రోసన్‌ మాత్రలు, 491 గ్రాముల హాష్‌ ఆయిల్‌ సీజ్ చేశారు. సోషల్ మీడియా ద్వారా పరిచయాలు పెంచుకునే బిలాల్.. వివిధ సంస్థలకు చెందిన 50 మంది ఉద్యోగులకు డ్రగ్స్‌ సరఫరా చేసినట్లు తెలిసింది. ఇతడి వద్ద డ్రగ్స్ కొనుగోలు చేసిన వారందరినీ అరెస్ట్ చేస్తామని పోలీసులు వెల్లడించారు. బిలాల్‌ జైలులో ఉన్నప్పుడు కూడా తన అనుచరుల ద్వారా ఐటీ ఉద్యోగులకు డ్రగ్స్‌ సరఫరా చేసేవాడని తెలిసింది.