నిరుద్యోగుల నుంచి రూ.కోట్లు వసూళ్లుచేసి... బోర్డు తిప్పేసిన మరో సాఫ్ట్‌వేర్ కంపెనీ

సాఫ్ట్‌వేర్ ఉద్యోగం చాలా మంది యువత కలల కొలవు. ఐదు అంకెల జీతం.. హైఫై లైఫ్. దీంతో చాలా మంది సాఫ్ట్‌వేర్ ఉద్యోగం చేసేందుకు మక్కువ చూపుతారు. ఇదే అదనుగా కొందరు మోసాలకు తెరలేపుతున్నారు. నిరుద్యోగుల ఆశల్ని పెట్టుబడిగా పెట్టుకొని మోసాలకు పాల్పడుతున్నారు. అందిన కాడికి దోచుకొని అడ్రస్ లేకుండా పోతున్నారు. ఇప్పటికే హైదరాబాద్ నగరంలో చాలా సాఫ్ట్‌వేర్ కంపెనీలు బోర్డులు తిప్పేశాయి. నిరుద్యోగులను నట్టేట ముంచి భారీ స్కాంలకు తెరలేపాయి.

  తాజాగా.. హైదరాబాద్‌లో మరో సాఫ్ట్‌‍వేర్ కంపెనీ బోర్డు తిప్పేసింది. వందల సంఖ్యలో నిరుద్యోగుల నుంచి డబ్బులు వసూలు చేసి దుకాణం ఎత్తేసింది. దీంతో మోసపోయిన బాధితులు పోలీసులను ఆశ్రయించారు. వివరాల్లోకి వెళితే.. హైదరాబాద్ మాదాపూర్ పోలీస్ స్టేషన్ పరిధిలోని అయ్యప్ప సోసైటీ 100 ఫీట్ రోడ్‌లో 'ఫ్రైడే అప్ కన్సల్టెన్సీ' పేరుతో కొందరు కేటుగాళ్లు ఓ కంపెనీ ఓపెన్ చేశారు. ఈ కన్సల్టేషన్ కంపెనీ ద్వారా దాదాపు 600 మందికి పైగా నిరుద్యోగుల నుంచి సాఫ్ట్‌వేర్ ఉద్యోగం పేరుతో రూ. 50 వేల నుంచి రూ.1లక్ష వరకు వసూలు చేశారు.

సాప్ట్‌వేర్ స్కిల్స్ నేర్పించటంతోపాటు ట్రైనింగ్ ఇచ్చి తామే జాబులు ఇప్పిస్తామని నమ్మించారు. అది నమ్మిన చాలా మంది నిరుద్యోగులు డబ్బులు కట్టి ఆ కంపెనీలో జాయిన్ అయ్యారు. శిక్షణ అనంతరం ప్లేస్‌మెంట్ ఇప్పిస్తామంటూ ప్రకటనలు ఇవ్వటంతో నమ్మి అందులో చేరారు. వీరు బెంగళూరు, విజయవాడ కేంద్రాలుగా బ్రాంచ్‌లు ఓపెన్ చేసి నిరుద్యోగులను బట్టులో వేసుకున్నారు. ఇలా బాధితులను నమ్మించి సుమారు రూ.10 కోట్లకు పైగా వసూలు చేశారు.

డబ్బులు చేతికి రాగానే.. రాత్రికి రాత్రే బోర్డు తిప్పేశారు. కన్సల్టెన్సీ కార్యాలయానికి తాళం వేయటంతో నిరుద్యోగులు ఆందోళన వ్యక్తం చేశారు. నిర్వహకులకు కాల్ చేసినా స్పందన లేదు. దీంతో మోసపోయామని గ్రహించిన బాధితులు వెంటనే మాదాపూర్ పోలీసులను ఆశ్రయించారు. గత కొంతకాలం నుంచి నిరుద్యోగులకు ఈ కంపెనీ శిక్షణ ఇచ్చినట్లు బాధితులు పోలీసులకు తెలిపారు. రెండ్రోజుల క్రితం ఫోన్ చేయగా.. మేనేజర్, ఉన్నత స్థాయి ఉద్యోగులెవరూ అందుబాటులోకి రావటం లేదని అన్నారు.

బాధితుల ఫిర్యాదు మేరకు పోలీసులు కేసు నమోదు చేసుకొని విచారణ చేపట్టారు. సంస్థ ఉన్నత స్థాయి ఉద్యోగులు, యజమాని దొరికితే అసలు విషయాలు బయటకు వస్తాయని అంటున్నారు. ఇప్పటి వరకు కంపెనీకి సంబంధించి ఎలాంటి సమాచారం అందుబాటులో లేదని చెప్పారు. త్వరలోనే నిందితులను పట్టుకొని బాధితులకు న్యాయం చేస్తామని హామీ ఇచ్చారు.