ఏడాది చిన్నారిపై పిట్‌బుల్ దాడి.. యజమానిపై కేసు పెట్టేందుకు పోలీసుల నిరాకరణ

అమెరికాలోని అత్యంత రద్దీగా ఉండే మన్హట్టన్ యూనియన్ స్క్వేర్ ప్రాంతంలో ఒక భయంకరమైన దృశ్యం ఆవిష్కృతమైంది. 'డిస్కో బుబ్బా' అనే రెండేళ్ల పిట్‌బుల్ కుక్క ఏడాది వయసున్న పసికందుపై కనికరం లేకుండా దాడి చేసింది. పది మంది చూస్తుండగానే ఆ పసిపాప కాలును గట్టిగా నోట కరుచుకుని.. ఎంతకీ వదలకపోవడంతో అక్కడి వారంతా భీతావహానికి లోనయ్యారు. కన్నతల్లి కుక్కను వదిలించడానికి ఎంతగానో ప్రయత్నించింది. కానీ ఫలితం లేకపోయింది. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతోంది.

ప్రాణాలకు తెగించి పోరాడిన బాటసారులు

సోషల్ మీడియాలో వైరల్ అవుతున్న వీడియో ప్రకారం.. పిట్‌బుల్ బలంగా పసివాడి కాలును పట్టుకుంది. కన్నతల్లి ఆ కుక్కను విడిపించడానికి చేసిన ప్రయత్నాలన్నీ విఫలం అయ్యాయి. ఆ సమయంలో కొంతమంది బాటసారులు హీరోల్లా ముందుకొచ్చారు. ఒకరు కుక్కను తన్నగా, మరొకరు దాన్ని హెడ్-లాక్ చేసి పట్టుకున్నారు. యజమాని కూడా కుక్క మెడలోని బెల్టును గట్టిగా లాగినా ప్రయోజనం లేకపోయింది. చివరకు ఒక వ్యక్తి ఆ కుక్కను వెనుక నుంచి వింత రీతిలో నియంత్రించడంతో.. అది చిన్నారి కాలును విడిచి పెట్టింది.

ఈ ఘటనపై నెటిజన్లు తీవ్ర ఆగ్రహం వ్యక్తం చేస్తున్నారు. పిట్‌బుల్స్ వంటి క్రూర స్వభావం ఉన్న కుక్కలను బహిరంగ ప్రదేశాల్లో ఉంచినప్పుడు కచ్చితంగా వాటి నోటికి మాస్క్ కట్టాలని డిమాండ్ చేస్తున్నారు. గతంలో టెన్నెస్సీలో కూడా ఏడు పిట్‌బుల్ కుక్కలు కలిసి ఒక వ్యక్తిని, అతని మూడు నెలల మనవరాలిని చంపేసిన ఘటనను స్థానిక ప్రజలు గుర్తు చేసుకుంటున్నారు. "ఇలాంటి కుక్కలను పెంచుకోవడం అంటే ఇంట్లో మృత్యువును పెట్టుకోవడమే" అని చాలా మంది అభిప్రాయ పడుతున్నారు. పోలీసులు కేసు పెట్టకపోయినా.. ఆ ప్రమాదకరమైన కుక్కను చంపేయడానికి చట్టపరమైన ఇతర మార్గాలను వెతుకుతామని బాధితుడి కుటుంబ సభ్యులు పేర్కొంటున్నారు.